śrīraghurājapadābjanikētana paṃkajalōcana maṃgaḷarāśē
caṃḍamahābhujadaṃḍa surārivikhaṃḍanapaṃḍita pāhi dayāḷō ।
pātakinaṃ ca samuddhara māṃ mahatāṃ hi satāmapi mānamudāraṃ
tvāṃ bhajatō mama dēhi dayāghana hē hanuman svapadāṃbujadāsyam ॥ 1 ॥
saṃsṛtitāpamahānaladagdhatanūruhamarmatanōrativēlaṃ
putradhanasvajanātmagṛhādiṣu saktamatēratikilbiṣamūrtēḥ ।
kēnacidapyamalēna purākṛtapuṇyasupuṃjalavēna vibhō vai
tvāṃ bhajatō mama dēhi dayāghana hē hanuman svapadāṃbujadāsyam ॥ 2 ॥
saṃsṛtikūpamanalpamaghōranidāghanidānamajasramaśēṣaṃ
prāpya suduḥkhasahasrabhujaṃgaviṣaikasamākulasarvatanōrmē ।
ghōramahākṛpaṇāpadamēva gatasya harē patitasya bhavābdhau
tvāṃ bhajatō mama dēhi dayāghana hē hanuman svapadāṃbujadāsyam ॥ 3 ॥
saṃsṛtisiṃdhuviśālakarālamahābalakālajhaṣagrasanārtaṃ
vyagrasamagradhiyaṃ kṛpaṇaṃ ca mahāmadanakrasucakrahṛtāsum ।
kālamahārasanōrminipīḍitamuddhara dīnamananyagatiṃ māṃ
tvāṃ bhajatō mama dēhi dayāghana hē hanuman svapadāṃbujadāsyam ॥ 4 ॥
saṃsṛtighōramahāgahanē caratō maṇiraṃjitapuṇyasumūrtēḥ
manmathabhīkaraghōramahōgramṛgapravarārditagātrasusaṃdhēḥ ।
matsaratāpaviśēṣanipīḍitabāhyamatēśca kathaṃ cidamēyaṃ
tvāṃ bhajatō mama dēhi dayāghana hē hanuman svapadāṃbujadāsyam ॥ 5 ॥
saṃsṛtivṛkṣamanēkaśatāghanidānamanaṃtavikarmasuśākhaṃ
duḥkhaphalaṃ karaṇādipalāśamanaṃgasupuṣpamaciṃtyasumūlam ।
taṃ hyadhiruhya harē patitaṃ śaraṇāgatamēva vimōcaya mūḍhaṃ
tvāṃ bhajatō mama dēhi dayāghana hē hanuman svapadāṃbujadāsyam ॥ 6 ॥
saṃsṛtipannagavaktrabhayaṃkaradaṃṣṭramahāviṣadagdhaśarīraṃ
prāṇavinirgamabhītisamākulamaṃdamanāthamatīva viṣaṇṇam ।
mōhamahākuharē patitaṃ dayayōddhara māmajitēṃdriyakāmaṃ
tvāṃ bhajatō mama dēhi dayāghana hē hanuman svapadāṃbujadāsyam ॥ 7 ॥
iṃdriyanāmakacōragaṇairhṛtatattvavivēkamahādhanarāśiṃ
saṃsṛtijālanipātitamēva mahābalibhiśca vikhaṃḍitakāyam ।
tvatpadapadmamanuttamamāśritamāśu kapīśvara pāhi kṛpāḷō
tvāṃ bhajatō mama dēhi dayāghana hē hanuman svapadāṃbujadāsyam ॥ 8 ॥
brahmamarudgaṇarudramahēṃdrakirīṭasukōṭilasatpadapīṭhaṃ
dāśarathiṃ japati kṣitimaṃḍala ēṣa nidhāya sadaiva hṛdabjē ।
tasya hanūmata ēva śivaṃkaramaṣṭakamētadaniṣṭaharaṃ vai
yaḥ satataṃ hi paṭhētsa narō labhatē'cyutarāmapadābjanivāsam ॥ 9 ॥
iti śrī madhusūdanāśrama śiṣyā'cyutaviracitaṃ śrīmaddanumadaṣṭakam ।