ṛṣaya uvāca ।
kathaṃ saṃkalpasiddhiḥ syādvēdavyāsa kalauyugē ।
dharmārthakāmamōkṣāṇāṃ sādhanaṃ kimudāhṛtam ॥ 1 ॥
vyāsa uvāca ।
śṛṇvaṃtu ṛṣayassarvē śīghraṃ saṃkalpasādhanam ।
sakṛduccāramātrēṇa bhōgamōkṣapradāyakam ॥ 2 ॥
gaurīśṛṃgē himavataḥ kalpavṛkṣōpaśōbhitam ।
dīptē divyamahāratna hēmamaṃḍapamadhyagam ॥ 3 ॥
ratnasiṃhāsanāsīnaṃ prasannaṃ paramēśvaram ।
maṃdasmitamukhāṃbhōjaṃ śaṃkaraṃ prāha pārvatī ॥ 4 ॥
śrīdēvī uvāca ।
dēvadēva mahādēva lōkaśaṃkara śaṃkara ।
maṃtrajālāni sarvāṇi yaṃtrajālāni kṛtsnaśaḥ ॥ 5 ॥
taṃtrajālānyanēkāni mayā tvattaḥ śrutāni vai ।
idānīṃ draṣṭumicchāmi viśēṣēṇa mahītalam ॥ 6 ॥
ityudīritamākarṇya pārvatyā paramēśvaraḥ ।
karēṇāmṛjya saṃtōṣāt pārvatīṃ pratyabhāṣata ॥ 7 ॥
mayēdānīṃ tvayā sārdhaṃ vṛṣamāruhya gamyatē ।
ityuktvā vṛṣamāruhya pārvatyā saha śaṃkaraḥ ॥ 8 ॥
yayau bhūmaṃḍalaṃ draṣṭuṃ gauryāścitrāṇi darśayan ।
kvacit viṃdhyācalaprāṃtē mahāraṇyē sudurgamē ॥ 9 ॥
tatra vyāhartumāyāṃtaṃ bhillaṃ paraśudhāriṇam ।
vadhyamānaṃ mahāvyāghraṃ nakhadaṃṣṭrābhirāvṛtam ॥ 10 ॥
atīva citracāritryaṃ vajrakāyasamāyutam ।
aprayatnamanāyāsamakhinnaṃ sukhamāsthitam ॥ 11 ॥
palāyaṃtaṃ mṛgaṃ paścādvyāghrō bhītyā palāyataḥ ।
ētadāścaryamālōkya pārvatī prāha śaṃkaram ॥ 12 ॥
śrī pārvatyuvāca ।
kimāścaryaṃ kimāścaryamagrē śaṃbhō nirīkṣyatām ।
ityuktaḥ sa tataḥ śaṃbhurdṛṣṭvā prāha purāṇavit ॥ 13 ॥
śrī śaṃkara uvāca ।
gauri vakṣyāmi tē citramavāṅmānasagōcaram ।
adṛṣṭapūrvamasmābhirnāsti kiṃcinna kutracit ॥ 14 ॥
mayā samyak samāsēna vakṣyatē śṛṇu pārvati ।
ayaṃ dūraśravā nāma bhillaḥ paramadhārmikaḥ ॥ 15 ॥
samitkuśaprasūnāni kaṃdamūlaphalādikam ।
pratyahaṃ vipinaṃ gatvā samādāya prayāsataḥ ॥ 16 ॥
priyē pūrvaṃ munīṃdrēbhyaḥ prayacchati na vāṃchati ।
tē'pi tasminnapi dayāṃ kurvatē sarvamauninaḥ ॥ 17 ॥
dalādanō mahāyōgī vasannēva nijāśramē ।
kadācidasmarat siddhaṃ dattātrēyaṃ digaṃbaram ॥ 18 ॥
dattātrēyaḥ smartṛgāmī cētihāsaṃ parīkṣitum ।
tatkṣaṇāt sō'pi yōgīṃdrō dattātrēyaḥ samutthitaḥ ॥ 19 ॥
taṃ dṛṣṭvāścaryatōṣābhyāṃ dalādanamahāmuniḥ ।
saṃpūjyāgrē viṣīdaṃtaṃ dattātrēyamuvāca tam ॥ 20 ॥
mayōpahūtaḥ saṃprāptō dattātrēya mahāmunē ।
smartṛgāmī tvamityētat kiṃ vadaṃtī parīkṣitum ॥ 21 ॥
mayādya saṃsmṛtō'si tvamaparādhaṃ kṣamasva mē ।
dattātrēyō muniṃ prāha mama prakṛtirīdṛśī ॥ 22 ॥
abhaktyā vā subhaktyā vā yaḥ smarēnnāmananyadhīḥ ।
tadānīṃ tamupāgamya dadāmi tadabhīpsitam ॥ 23 ॥
dattātrēyō muniṃ prāha dalādanamunīśvaram ।
yadiṣṭaṃ tadvṛṇīṣva tvaṃ yat prāptō'haṃ tvayā smṛtaḥ ॥ 24 ॥
dattātrēyaṃ muniṃ prāha mayā kimapi nōcyatē ।
tvaccittē yat sthitaṃ tanmē prayaccha munipuṃgava ॥ 25 ॥
śrī dattātrēya uvāca ।
mamāsti vajrakavacaṃ gṛhāṇētyavadanmunim ।
tathētyaṃgīkṛtavatē dalādamunayē muniḥ ॥ 26 ॥
svavajrakavacaṃ prāha ṛṣicchaṃdaḥ purassaram ।
nyāsaṃ dhyānaṃ phalaṃ tatra prayōjanamaśēṣataḥ ॥ 27 ॥
asya śrīdattātrēya vajrakavaca stōtramaṃtrasya, kirātarūpī mahārudrṛṣiḥ, anuṣṭup chaṃdaḥ, śrīdattātrēyō dēvatā, drāṃ bījaṃ, āṃ śaktiḥ, krauṃ kīlakam.
ōṃ ātmanē namaḥ
ōṃ drīṃ manasē namaḥ
ōṃ āṃ drīṃ śrīṃ sauḥ
ōṃ klāṃ klīṃ klūṃ klaiṃ klauṃ klaḥ
śrī dattātrēya prasāda siddhyarthē japē viniyōgaḥ
karanyāsaḥ ।
ōṃ drāṃ aṃguṣṭhābhyāṃ namaḥ ।
ōṃ drīṃ tarjanībhyāṃ namaḥ ।
ōṃ drūṃ madhyamābhyāṃ namaḥ ।
ōṃ draiṃ anāmikābhyāṃ namaḥ ।
ōṃ drauṃ kaniṣṭhikābhyāṃ namaḥ ।
ōṃ draḥ karatalakarapṛṣṭhābhyāṃ namaḥ ।
hṛdayādinyāsaḥ ।
ōṃ drāṃ hṛdayāya namaḥ ।
ōṃ drīṃ śirasē svāhā ।
ōṃ drūṃ śikhāyai vaṣaṭ ।
ōṃ draiṃ kavacāya hum ।
ōṃ drauṃ nētratrayāya vauṣaṭ ।
ōṃ draḥ astrāya phaṭ ।
ōṃ bhūrbhuvassuvarōmiti digbaṃdhaḥ ।
dhyānam ।
jagadaṃkurakaṃdāya saccidānaṃdamūrtayē ।
dattātrēyāya yōgīṃdracaṃdrāya paramātmanē ॥ 1 ॥
kadā yōgī kadā bhōgī kadā nagnaḥ piśācavat ।
dattātrēyō hariḥ sākṣāt bhuktimuktipradāyakaḥ ॥ 2 ॥
vārāṇasīpurasnāyī kolhāpurajapādaraḥ ।
māhurīpurabhīkṣāśī sahyaśāyī digaṃbaraḥ ॥ 3 ॥
iṃdranīla samākāraḥ caṃdrakāṃtisamadyutiḥ ।
vaiḍhūrya sadṛśasphūrtiḥ calatkiṃcijjaṭādharaḥ ॥ 4 ॥
snigdhadhāvalya yuktākṣō'tyaṃtanīla kanīnikaḥ ।
bhrūvakṣaḥśmaśrunīlāṃkaḥ śaśāṃkasadṛśānanaḥ ॥ 5 ॥
hāsanirjita nihāraḥ kaṃṭhanirjita kaṃbukaḥ ।
māṃsalāṃsō dīrghabāhuḥ pāṇinirjitapallavaḥ ॥ 6 ॥
viśālapīnavakṣāśca tāmrapāṇirdalōdaraḥ ।
pṛthulaśrōṇilalitō viśālajaghanasthalaḥ ॥ 7 ॥
raṃbhāstaṃbhōpamānōruḥ jānupūrvaikajaṃghakaḥ ।
gūḍhagulphaḥ kūrmapṛṣṭhō lasatvādōparisthalaḥ ॥ 8 ॥
raktāraviṃdasadṛśa ramaṇīya padādharaḥ ।
carmāṃbaradharō yōgī smartṛgāmī kṣaṇēkṣaṇē ॥ 9 ॥
jñānōpadēśaniratō vipaddharaṇadīkṣitaḥ ।
siddhāsanasamāsīna ṛjukāyō hasanmukhaḥ ॥ 10 ॥
vāmahastēna varadō dakṣiṇēnābhayaṃkaraḥ ।
bālōnmatta piśācībhiḥ kvacid yuktaḥ parīkṣitaḥ ॥ 11 ॥
tyāgī bhōgī mahāyōgī nityānaṃdō niraṃjanaḥ ।
sarvarūpī sarvadātā sarvagaḥ sarvakāmadaḥ ॥ 12 ॥
bhasmōddhūḷita sarvāṃgō mahāpātakanāśanaḥ ।
bhuktipradō muktidātā jīvanmuktō na saṃśayaḥ ॥ 13 ॥
ēvaṃ dhyātvā'nanyacittō madvajrakavacaṃ paṭhēt ।
māmēva paśyansarvatra sa mayā saha saṃcarēt ॥ 14 ॥
digaṃbaraṃ bhasmasugaṃdha lēpanaṃ
cakraṃ triśūlaṃ ḍhamaruṃ gadāyudham ।
padmāsanaṃ yōgimunīṃdravaṃditaṃ
dattētināmasmaraṇēna nityam ॥ 15 ॥
paṃcōpacārapūjā ।
ōṃ laṃ pṛthivītattvātmanē śrīdattātrēyāya namaḥ ।
gaṃdhaṃ parikalpayāmi।
ōṃ haṃ ākāśatattvātmanē śrīdattātrēyāya namaḥ ।
puṣpaṃ parikalpayāmi ।
ōṃ yaṃ vāyutattvātmanē śrīdattātrēyāya namaḥ ।
dhūpaṃ parikalpayāmi ।
ōṃ raṃ vahnitattvātmanē śrīdattātrēyāya namaḥ ।
dīpaṃ parikalpayāmi ।
ōṃ vaṃ amṛta tattvātmanē śrīdattātrēyāya namaḥ ।
amṛtanaivēdyaṃ parikalpayāmi ।
ōṃ saṃ sarvatattvātmanē śrīdattātrēyāya namaḥ ।
tāṃbūlādisarvōpacārān parikalpayāmi ।
(anaṃtaraṃ ‘ōṃ drāṃ…’ iti mūlamaṃtraṃ aṣṭōttaraśatavāraṃ (108) japēt)
atha vajrakavacam ।
ōṃ dattātrēyāya śiraḥpātu sahasrābjēṣu saṃsthitaḥ ।
phālaṃ pātvānasūyēyaḥ caṃdramaṃḍalamadhyagaḥ ॥ 1 ॥
kūrcaṃ manōmayaḥ pātu haṃ kṣaṃ dvidalapadmabhūḥ ।
jyōtirūpō'kṣiṇīpātu pātu śabdātmakaḥ śrutī ॥ 2 ॥
nāsikāṃ pātu gaṃdhātmā mukhaṃ pātu rasātmakaḥ ।
jihvāṃ vēdātmakaḥ pātu daṃtōṣṭhau pātu dhārmikaḥ ॥ 3 ॥
kapōlāvatribhūḥ pātu pātvaśēṣaṃ mamātmavit ।
sarvātmā ṣōḍaśārābjasthitaḥ svātmā'vatād galam ॥ 4 ॥
skaṃdhau caṃdrānujaḥ pātu bhujau pātu kṛtādibhūḥ ।
jatruṇī śatrujit pātu pātu vakṣasthalaṃ hariḥ ॥ 5 ॥
kādiṭhāṃtadvādaśārapadmagō marudātmakaḥ ।
yōgīśvarēśvaraḥ pātu hṛdayaṃ hṛdayasthitaḥ ॥ 6 ॥
pārśvē hariḥ pārśvavartī pātu pārśvasthitaḥ smṛtaḥ ।
haṭhayōgādiyōgajñaḥ kukṣiṃ pātu kṛpānidhiḥ ॥ 7 ॥
ḍakārādi phakārāṃta daśārasarasīruhē ।
nābhisthalē vartamānō nābhiṃ vahnyātmakō'vatu ॥ 8 ॥
vahnitattvamayō yōgī rakṣatānmaṇipūrakam ।
kaṭiṃ kaṭisthabrahmāṃḍavāsudēvātmakō'vatu ॥ 9 ॥
vakārādi lakārāṃta ṣaṭpatrāṃbujabōdhakaḥ ।
jalatattvamayō yōgī svādhiṣṭhānaṃ mamāvatu ॥ 10 ॥
siddhāsana samāsīna ūrū siddhēśvarō'vatu ।
vādisāṃta catuṣpatrasarōruha nibōdhakaḥ ॥ 11 ॥
mūlādhāraṃ mahīrūpō rakṣatād vīryanigrahī ।
pṛṣṭhaṃ ca sarvataḥ pātu jānunyastakarāṃbujaḥ ॥ 12 ॥
jaṃghē pātvavadhūtēṃdraḥ pātvaṃghrī tīrthapāvanaḥ ।
sarvāṃgaṃ pātu sarvātmā rōmāṇyavatu kēśavaḥ ॥ 13 ॥
carma carmāṃbaraḥ pātu raktaṃ bhaktipriyō'vatu ।
māṃsaṃ māṃsakaraḥ pātu majjāṃ majjātmakō'vatu ॥ 14 ॥
asthīni sthiradhīḥ pāyānmēdhāṃ vēdhāḥ prapālayēt ।
śukraṃ sukhakaraḥ pātu cittaṃ pātu dṛḍhākṛtiḥ ॥ 15 ॥
manōbuddhimahaṃkāraṃ hṛṣīkēśātmakō'vatu ।
karmēṃdriyāṇi pātvīśaḥ pātu jñānēṃdriyāṇyajaḥ ॥ 16 ॥
baṃdhūn baṃdhūttamaḥ pāyācchatrubhyaḥ pātu śatrujit ।
gṛhārāmadhanakṣētraputrādīn śaṃkarō'vatu ॥ 17 ॥
bhāryāṃ prakṛtivit pātu paśvādīn pātu śārṃgabhṛt ।
prāṇān pātu pradhānajñō bhakṣyādīn pātu bhāskaraḥ ॥ 18 ॥
sukhaṃ caṃdrātmakaḥ pātu duḥkhāt pātu purāṃtakaḥ ।
paśūn paśupatiḥ pātu bhūtiṃ bhūtēśvarō mama ॥ 19 ॥
prācyāṃ viṣaharaḥ pātu pātvāgnēyyāṃ makhātmakaḥ ।
yāmyāṃ dharmātmakaḥ pātu nairṛtyāṃ sarvavairihṛt ॥ 20 ॥
varāhaḥ pātu vāruṇyāṃ vāyavyāṃ prāṇadō'vatu ।
kaubēryāṃ dhanadaḥ pātu pātvaiśānyāṃ mahāguruḥ ॥ 21 ॥
ūrdhvaṃ pātu mahāsiddhaḥ pātvadhastājjaṭādharaḥ ।
rakṣāhīnaṃ tu yat sthānaṃ rakṣatvādimunīśvaraḥ ॥ 22 ॥
karanyāsaḥ ।
ōṃ drāṃ aṃguṣṭhābhyāṃ namaḥ ।
ōṃ drīṃ tarjanībhyāṃ namaḥ ।
ōṃ drūṃ madhyamābhyāṃ namaḥ ।
ōṃ draiṃ anāmikābhyāṃ namaḥ ।
ōṃ drauṃ kaniṣṭhikābhyāṃ namaḥ ।
ōṃ draḥ karatalakarapṛṣṭhābhyāṃ namaḥ ।
hṛdayādinyāsaḥ ।
ōṃ drāṃ hṛdayāya namaḥ ।
ōṃ drīṃ śirasē svāhā ।
ōṃ drūṃ śikhāyai vaṣaṭ ।
ōṃ draiṃ kavacāya hum ।
ōṃ drauṃ nētratrayāya vauṣaṭ ।
ōṃ draḥ astrāya phaṭ ।
ōṃ bhūrbhuvassuvarōmiti digvimōkaḥ ।
phalaśṛti ॥
ētanmē vajrakavacaṃ yaḥ paṭhēt śṛṇuyādapi ।
vajrakāyaściraṃjīvī dattātrēyō'hamabruvam ॥ 23 ॥
tyāgī bhōgī mahāyōgī sukhaduḥkhavivarjitaḥ ।
sarvatra siddhasaṃkalpō jīvanmuktō'dyavartatē ॥ 24 ॥
ityuktvāṃtardadhē yōgī dattātrēyō digaṃbaraḥ ।
dalādanō'pi tajjaptvā jīvanmuktaḥ sa vartatē ॥ 25 ॥
bhillō dūraśravā nāma tadānīṃ śrutavānidam ।
sakṛcchravaṇamātrēṇa vajrāṃgō'bhavadapyasau ॥ 26 ॥
ityētad vajrakavacaṃ dattātrēyasya yōginaḥ ।
śrutvā śēṣaṃ śaṃbhumukhāt punarapyāha pārvatī ॥ 27 ॥
śrī pārvatyuvāca ।
ētat kavaca māhātmyaṃ vada vistaratō mama ।
kutra kēna kadā jāpyaṃ kiyajjāpyaṃ kathaṃ katham ॥ 28 ॥
uvāca śaṃbhustat sarvaṃ pārvatyā vinayōditam ।
śrīparamēśvara uvāca ।
śṛṇu pārvati vakṣyāmi samāhitamanāvilam ॥ 29 ॥
dharmārthakāmamōkṣāṇāmidamēva parāyaṇam ।
hastyaśvarathapādāti sarvaiśvarya pradāyakam ॥ 30 ॥
putramitrakaḷatrādi sarvasaṃtōṣasādhanam ।
vēdaśāstrādividyānāṃ vidhānaṃ paramaṃ hi tat ॥ 31 ॥
saṃgīta śāstra sāhitya satkavitva vidhāyakam ।
buddhi vidyā smṛti prajñā mati prauḍhipradāyakam ॥ 32 ॥
sarvasaṃtōṣakaraṇaṃ sarvaduḥkhanivāraṇam ।
śatrusaṃhārakaṃ śīghraṃ yaśaḥkīrtivivardhanam ॥ 33 ॥
aṣṭasaṃkhyā mahārōgāḥ sannipātāstrayōdaśa ।
ṣaṇṇavatyakṣirōgāśca viṃśatirmēharōgakāḥ ॥ 34 ॥
aṣṭādaśatu kuṣṭhāni gulmānyaṣṭavidhānyapi ।
aśītirvātarōgāśca catvāriṃśattu paittikāḥ ॥ 35 ॥
viṃśatiḥ ślēṣmarōgāśca kṣayacāturthikādayaḥ ।
maṃtrayaṃtrakuyōgādyāḥ kalpataṃtrādinirmitāḥ ॥ 36 ॥
brahmarākṣasa vētālakūṣmāṃḍādi grahōdbhavāḥ ।
saṃgajā dēśakālasthāstāpatrayasamutthitāḥ ॥ 37 ॥
navagrahasamudbhūtā mahāpātaka saṃbhavāḥ ।
sarvē rōgāḥ praṇaśyaṃti sahasrāvartanād dhruvam ॥ 38 ॥
ayutāvṛttimātrēṇa vaṃdhyā putravatī bhavēt ।
ayutadvitayāvṛttyā hyapamṛtyujayō bhavēt ॥ 39 ॥
ayutatritayāccaiva khēcaratvaṃ prajāyatē ।
sahasrāyutadarvāk sarvakāryāṇi sādhayēt ॥ 40 ॥
lakṣāvṛttyā sarvasiddhirbhavatyēva na saṃśayaḥ ॥ 41 ॥
viṣavṛkṣasya mūlēṣu tiṣṭhan vai dakṣiṇāmukhaḥ ।
kurutē māsamātrēṇa vairiṇaṃ vikalēṃdriyam ॥ 42 ॥
auduṃbaratarōrmūlē vṛddhikāmēna jāpyatē ।
śrīvṛkṣamūlē śrīkāmī tiṃtriṇī śāṃtikarmaṇi ॥ 43 ॥
ōjaskāmō'śvatthamūlē strīkāmaiḥ sahakārakē ।
jñānārthī tulasīmūlē garbhagēhē sutārthibhiḥ ॥ 44 ॥
dhanārthibhistu sukṣētrē paśukāmaistu gōṣṭhakē ।
dēvālayē sarvakāmaistatkālē sarvadarśitam ॥ 45 ॥
nābhimātrajalē sthitvā bhānumālōkya yō japēt ।
yuddhē vā śāstravādē vā sahasrēṇa jayō bhavēt ॥ 46 ॥
kaṃṭhamātrē jalē sthitvā yō rātrau kavacaṃ paṭhēt ।
jvarāpasmārakuṣṭhādi tāpajvaranivāraṇam ॥ 47 ॥
yatra yat syāt sthiraṃ yadyat prasaktaṃ tannivartatē ।
tēna tatra hi japtavyaṃ tataḥ siddhirbhavēddhruvam ॥ 48 ॥
ityuktavān śivō gaurvai rahasyaṃ paramaṃ śubham ।
yaḥ paṭhēt vajrakavacaṃ dattātrēya samō bhavēt ॥ 49 ॥
ēvaṃ śivēna kathitaṃ himavatsutāyai
prōktaṃ dalādamunayē'trisutēna pūrvam ।
yaḥ kō'pi vajrakavacaṃ paṭhatīha lōkē
dattōpamaścarati yōgivaraścirāyuḥ ॥ 50 ॥
iti śrī rudrayāmaḷē himavatkhaṃḍē maṃtraśāstrē umāmahēśvarasaṃvādē śrī dattātrēya vajrakavacastōtraṃ saṃpūrṇam ॥