nityānaṃdakarī varābhayakarī sauṃdarya ratnākarī
nirdhūtākhila ghōra pāvanakarī pratyakṣa māhēśvarī ।
prālēyācala vaṃśa pāvanakarī kāśīpurādhīśvarī
bhikṣāṃ dēhi kṛpāvalaṃbanakarī mātānnapūrṇēśvarī ॥ 1 ॥
nānā ratna vicitra bhūṣaṇakari hēmāṃbarāḍaṃbarī
muktāhāra vilaṃbamāna vilasat-vakṣōja kuṃbhāṃtarī ।
kāśmīrāgaru vāsitā rucikarī kāśīpurādhīśvarī
bhikṣāṃ dēhi kṛpāvalaṃbanakarī mātānnapūrṇēśvarī ॥ 2 ॥
yōgānaṃdakarī ripukṣayakarī dharmaikya niṣṭhākarī
caṃdrārkānala bhāsamāna laharī trailōkya rakṣākarī ।
sarvaiśvaryakarī tapaḥ phalakarī kāśīpurādhīśvarī
bhikṣāṃ dēhi kṛpāvalaṃbanakarī mātānnapūrṇēśvarī ॥ 3 ॥
kailāsācala kaṃdarālayakarī gaurī-hyumāśāṃkarī
kaumārī nigamārtha-gōcarakarī-hyōṃkāra-bījākṣarī ।
mōkṣadvāra-kavāṭapāṭanakarī kāśīpurādhīśvarī
bhikṣāṃ dēhi kṛpāvalaṃbanakarī mātānnapūrṇēśvarī ॥ 4 ॥
dṛśyādṛśya-vibhūti-vāhanakarī brahmāṃḍa-bhāṃḍōdarī
līlā-nāṭaka-sūtra-khēlanakarī vijñāna-dīpāṃkurī ।
śrīviśvēśamanaḥ-prasādanakarī kāśīpurādhīśvarī
bhikṣāṃ dēhi kṛpāvalaṃbanakarī mātānnapūrṇēśvarī ॥ 5 ॥
urvīsarvajayēśvarī bhagavatī [jayakarī] mātā kṛpāsāgarī
vēṇī-nīlasamāna-kuṃtaladharī nityānna-dānēśvarī ।
sākṣānmōkṣakarī sadā śubhakarī kāśīpurādhīśvarī
bhikṣāṃ dēhi kṛpāvalaṃbanakarī mātānnapūrṇēśvarī ॥ 6 ॥
ādikṣāṃta-samastavarṇanakarī śaṃbhōstribhāvākarī
kāśmīrā tripurēśvarī trinayani viśvēśvarī śarvarī ।
svargadvāra-kapāṭa-pāṭanakarī kāśīpurādhīśvarī
bhikṣāṃ dēhi kṛpāvalaṃbanakarī mātānnapūrṇēśvarī ॥ 7 ॥
dēvī sarvavicitra-ratnarucitā dākṣāyiṇī suṃdarī
vāmā-svādupayōdharā priyakarī saubhāgyamāhēśvarī ।
bhaktābhīṣṭakarī sadā śubhakarī kāśīpurādhīśvarī
bhikṣāṃ dēhi kṛpāvalaṃbanakarī mātānnapūrṇēśvarī ॥ 8 ॥
caṃdrārkānala-kōṭikōṭi-sadṛśī caṃdrāṃśu-biṃbādharī
caṃdrārkāgni-samāna-kuṃḍala-dharī caṃdrārka-varṇēśvarī
mālā-pustaka-pāśasāṃkuśadharī kāśīpurādhīśvarī
bhikṣāṃ dēhi kṛpāvalaṃbanakarī mātānnapūrṇēśvarī ॥ 9 ॥
kṣatratrāṇakarī mahābhayakarī mātā kṛpāsāgarī
sarvānaṃdakarī sadā śivakarī viśvēśvarī śrīdharī ।
dakṣākraṃdakarī nirāmayakarī kāśīpurādhīśvarī
bhikṣāṃ dēhi kṛpāvalaṃbanakarī mātānnapūrṇēśvarī ॥ 10 ॥
annapūrṇē sadāpūrṇē śaṃkara-prāṇavallabhē ।
jñāna-vairāgya-siddhyarthaṃ bhikṣāṃ dēhi ca pārvatī ॥ 11 ॥
mātā ca pārvatīdēvī pitādēvō mahēśvaraḥ ।
bāṃdhavā: śivabhaktāśca svadēśō bhuvanatrayaṃ ॥ 12 ॥
sarva-maṃgaḷa-māṃgaḷyē śivē sarvārtha-sādhikē ।
śaraṇyē tryaṃbakē gauri nārāyaṇi namō'stu tē ॥ 13 ॥