cāṃpēyagaurārdhaśarīrakāyai
karpūragaurārdhaśarīrakāya ।
dhammillakāyai ca jaṭādharāya
namaḥ śivāyai ca namaḥ śivāya ॥ 1 ॥
kastūrikākuṃkumacarcitāyai
citārajaḥpuṃja vicarcitāya ।
kṛtasmarāyai vikṛtasmarāya
namaḥ śivāyai ca namaḥ śivāya ॥ 2 ॥
jhaṇatkvaṇatkaṃkaṇanūpurāyai
pādābjarājatphaṇinūpurāya ।
hēmāṃgadāyai bhujagāṃgadāya
namaḥ śivāyai ca namaḥ śivāya ॥ 3 ॥
viśālanīlōtpalalōcanāyai
vikāsipaṃkēruhalōcanāya ।
samēkṣaṇāyai viṣamēkṣaṇāya
namaḥ śivāyai ca namaḥ śivāya ॥ 4 ॥
maṃdāramālākalitālakāyai
kapālamālāṃkitakaṃdharāya ।
divyāṃbarāyai ca digaṃbarāya
namaḥ śivāyai ca namaḥ śivāya ॥ 5 ॥
aṃbhōdharaśyāmalakuṃtalāyai
taṭitprabhātāmrajaṭādharāya ।
nirīśvarāyai nikhilēśvarāya
namaḥ śivāyai ca namaḥ śivāya ॥ 6 ॥
prapaṃcasṛṣṭyunmukhalāsyakāyai
samastasaṃhārakatāṃḍavāya ।
jagajjananyai jagadēkapitrē
namaḥ śivāyai ca namaḥ śivāya ॥ 7 ॥
pradīptaratnōjjvalakuṃḍalāyai
sphuranmahāpannagabhūṣaṇāya ।
śivānvitāyai ca śivānvitāya
namaḥ śivāyai ca namaḥ śivāya ॥ 8 ॥
ētatpaṭhēdaṣṭakamiṣṭadaṃ yō
bhaktyā sa mānyō bhuvi dīrghajīvī ।
prāpnōti saubhāgyamanaṃtakālaṃ
bhūyātsadā tasya samastasiddhiḥ ॥