॥ atha śrī durgā sahasranāmastōtram ॥
nārada uvāca -
kumāra guṇagaṃbhīra dēvasēnāpatē prabhō ।
sarvābhīṣṭapradaṃ puṃsāṃ sarvapāpapraṇāśanam ॥ 1॥
guhyādguhyataraṃ stōtraṃ bhaktivardhakamaṃjasā ।
maṃgalaṃ grahapīḍādiśāṃtidaṃ vaktumarhasi ॥ 2॥
skaṃda uvāca -
śṛṇu nārada dēvarṣē lōkānugrahakāmyayā ।
yatpṛcchasi paraṃ puṇyaṃ tattē vakṣyāmi kautukāt ॥ 3॥
mātā mē lōkajananī himavannagasattamāt ।
mēnāyāṃ brahmavādinyāṃ prādurbhūtā harapriyā ॥ 4॥
mahatā tapasā''rādhya śaṃkaraṃ lōkaśaṃkaram ।
svamēva vallabhaṃ bhējē kalēva hi kalānidhim ॥ 5॥
nagānāmadhirājastu himavān virahāturaḥ ।
svasutāyāḥ parikṣīṇē vasiṣṭhēna prabōdhitaḥ ॥ 6॥
trilōkajananī sēyaṃ prasannā tvayi puṇyataḥ ।
prādurbhūtā sutātvēna tadviyōgaṃ śubhaṃ tyaja ॥ 7॥
bahurūpā ca durgēyaṃ bahunāmnī sanātanī ।
sanātanasya jāyā sā putrīmōhaṃ tyajādhunā ॥ 8॥
iti prabōdhitaḥ śailaḥ tāṃ tuṣṭāva parāṃ śivām ।
tadā prasannā sā durgā pitaraṃ prāha naṃdinī ॥ 9॥
matprasādātparaṃ stōtraṃ hṛdayē pratibhāsatām ।
tēna nāmnāṃ sahasrēṇa pūjayan kāmamāpnuhi ॥ 10॥
ityuktvāṃtarhitāyāṃ tu hṛdayē sphuritaṃ tadā ।
nāmnāṃ sahasraṃ durgāyāḥ pṛcchatē mē yaduktavān ॥ 11॥
maṃgalānāṃ maṃgalaṃ tad durgānāma sahasrakam ।
sarvābhīṣṭapradāṃ puṃsāṃ bravīmyakhilakāmadam ॥ 12॥
durgādēvī samākhyātā himavānṛṣirucyatē ।
chaṃdōnuṣṭup japō dēvyāḥ prītayē kriyatē sadā ॥ 13॥
asya śrīdurgāstōtramahāmaṃtrasya । himavān ṛṣiḥ । anuṣṭup chaṃdaḥ ।
durgābhagavatī dēvatā । śrīdurgāprasādasiddhyarthē japē viniyōgaḥ । ।
śrībhagavatyai durgāyai namaḥ ।
dēvīdhyānaṃ
ōṃ hrīṃ kālābhrābhāṃ kaṭākṣairarikulabhayadāṃ maulibaddhēṃdurēkhāṃ
śaṃkhaṃ cakraṃ kṛpāṇaṃ triśikhamapi karairudvahaṃtīṃ trinētrām ।
siṃhaskaṃdhādhirūḍhāṃ tribhuvanamakhilaṃ tējasā pūrayaṃtīṃ
dhyāyēd durgāṃ jayākhyāṃ tridaśaparivṛtāṃ sēvitāṃ siddhikāmaiḥ ॥
śrī jayadurgāyai namaḥ ।
ōṃ śivāthōmā ramā śaktiranaṃtā niṣkalā'malā ।
śāṃtā māhēśvarī nityā śāśvatā paramā kṣamā ॥ 1॥
aciṃtyā kēvalānaṃtā śivātmā paramātmikā ।
anādiravyayā śuddhā sarvajñā sarvagā'calā ॥ 2॥
ēkānēkavibhāgasthā māyātītā sunirmalā ।
mahāmāhēśvarī satyā mahādēvī niraṃjanā ॥ 3॥
kāṣṭhā sarvāṃtarasthā'pi cicchaktiścātrilālitā ।
sarvā sarvātmikā viśvā jyōtīrūpākṣarāmṛtā ॥ 4॥
śāṃtā pratiṣṭhā sarvēśā nivṛttiramṛtapradā ।
vyōmamūrtirvyōmasaṃsthā vyōmadhārā'cyutā'tulā ॥ 5॥
anādinidhanā'mōghā kāraṇātmakalākulā ।
ṛtuprathamajā'nābhiramṛtātmasamāśrayā ॥ 6॥
prāṇēśvarapriyā namyā mahāmahiṣaghātinī ।
prāṇēśvarī prāṇarūpā pradhānapuruṣēśvarī ॥ 7॥
sarvaśaktikalā'kāmā mahiṣēṣṭavināśinī ।
sarvakāryaniyaṃtrī ca sarvabhūtēśvarēśvarī ॥ 8॥
aṃgadādidharā caiva tathā mukuṭadhāriṇī ।
sanātanī mahānaṃdā''kāśayōnistathēcyatē ॥ 9॥
citprakāśasvarūpā ca mahāyōgēśvarēśvarī ।
mahāmāyā saduṣpārā mūlaprakṛtirīśikā ॥ 10॥
saṃsārayōniḥ sakalā sarvaśaktisamudbhavā ।
saṃsārapārā durvārā durnirīkṣā durāsadā ॥ 11॥
prāṇaśaktiśca sēvyā ca yōginī paramākalā ।
mahāvibhūtirdurdarśā mūlaprakṛtisaṃbhavā ॥ 12॥
anādyanaṃtavibhavā parārthā puruṣāraṇiḥ ।
sargasthityaṃtakṛccaiva sudurvācyā duratyayā ॥ 13॥
śabdagamyā śabdamāyā śabdākhyānaṃdavigrahā ।
pradhānapuruṣātītā pradhānapuruṣātmikā ॥ 14॥
purāṇī cinmayā puṃsāmiṣṭadā puṣṭirūpiṇī ।
pūtāṃtarasthā kūṭasthā mahāpuruṣasaṃjñitā ॥ 15॥
janmamṛtyujarātītā sarvaśaktisvarūpiṇī ।
vāṃchāpradā'navacchinnapradhānānupravēśinī ॥ 16॥
kṣētrajñā'ciṃtyaśaktistu prōcyatē'vyaktalakṣaṇā ।
malāpavarjitā''nādimāyā tritayatattvikā ॥ 17॥
prītiśca prakṛtiścaiva guhāvāsā tathōcyatē ।
mahāmāyā nagōtpannā tāmasī ca dhruvā tathā ॥ 18॥
vyaktā'vyaktātmikā kṛṣṇā raktā śuklā hyakāraṇā ।
prōcyatē kāryajananī nityaprasavadharmiṇī ॥ 19॥
sargapralayamuktā ca sṛṣṭisthityaṃtadharmiṇī ।
brahmagarbhā caturviṃśasvarūpā padmavāsinī ॥ 20॥
acyutāhlādikā vidyudbrahmayōnirmahālayā ।
mahālakṣmī samudbhāvabhāvitātmāmahēśvarī ॥ 21॥
mahāvimānamadhyasthā mahānidrā sakautukā ।
sarvārthadhāriṇī sūkṣmā hyaviddhā paramārthadā ॥ 22॥
anaṃtarūpā'naṃtārthā tathā puruṣamōhinī ।
anēkānēkahastā ca kālatrayavivarjitā ॥ 23॥
brahmajanmā haraprītā matirbrahmaśivātmikā ।
brahmēśaviṣṇusaṃpūjyā brahmākhyā brahmasaṃjñitā ॥ 24॥
vyaktā prathamajā brāhmī mahārātrīḥ prakīrtitā ।
jñānasvarūpā vairāgyarūpā hyaiśvaryarūpiṇī ॥ 25॥
dharmātmikā brahmamūrtiḥ pratiśrutapumarthikā ।
apāṃyōniḥ svayaṃbhūtā mānasī tattvasaṃbhavā ॥ 26॥
īśvarasya priyā prōktā śaṃkarārdhaśarīriṇī ।
bhavānī caiva rudrāṇī mahālakṣmīstathā'ṃbikā ॥ 27॥
mahēśvarasamutpannā bhuktimukti pradāyinī ।
sarvēśvarī sarvavaṃdyā nityamuktā sumānasā ॥ 28॥
mahēṃdrōpēṃdranamitā śāṃkarīśānuvartinī ।
īśvarārdhāsanagatā māhēśvarapativratā ॥ 29॥
saṃsāraśōṣiṇī caiva pārvatī himavatsutā ।
paramānaṃdadātrī ca guṇāgryā yōgadā tathā ॥ 30॥
jñānamūrtiśca sāvitrī lakṣmīḥ śrīḥ kamalā tathā ।
anaṃtaguṇagaṃbhīrā hyurōnīlamaṇiprabhā ॥ 31॥
sarōjanilayā gaṃgā yōgidhyēyā'surārdinī ।
sarasvatī sarvavidyā jagajjyēṣṭhā sumaṃgalā ॥ 32॥
vāgdēvī varadā varyā kīrtiḥ sarvārthasādhikā ।
vāgīśvarī brahmavidyā mahāvidyā suśōbhanā ॥ 33॥
grāhyavidyā vēdavidyā dharmavidyā''tmabhāvitā ।
svāhā viśvaṃbharā siddhiḥ sādhyā mēdhā dhṛtiḥ kṛtiḥ ॥ 34॥
sunītiḥ saṃkṛtiścaiva kīrtitā naravāhinī ।
pūjāvibhāvinī saumyā bhōgyabhāg bhōgadāyinī ॥ 35॥
śōbhāvatī śāṃkarī ca lōlā mālāvibhūṣitā ।
paramēṣṭhipriyā caiva trilōkīsuṃdarī mātā ॥ 36॥
naṃdā saṃdhyā kāmadhātrī mahādēvī susāttvikā ।
mahāmahiṣadarpaghnī padmamālā'ghahāriṇī ॥ 37॥
vicitramukuṭā rāmā kāmadātā prakīrtitā ।
pitāṃbaradharā divyavibhūṣaṇa vibhūṣitā ॥ 38॥
divyākhyā sōmavadanā jagatsaṃsṛṣṭivarjitā ।
niryaṃtrā yaṃtravāhasthā naṃdinī rudrakālikā ॥ 39॥
ādityavarṇā kaumārī mayūravaravāhinī ।
padmāsanagatā gaurī mahākālī surārcitā ॥ 40॥
aditirniyatā raudrī padmagarbhā vivāhanā ।
virūpākṣā kēśivāhā guhāpuranivāsinī ॥ 41॥
mahāphalā'navadyāṃgī kāmarūpā saridvarā ।
bhāsvadrūpā muktidātrī praṇataklēśabhaṃjanā ॥ 42॥
kauśikī gōminī rātristridaśārivināśinī ।
bahurūpā surūpā ca virūpā rūpavarjitā ॥ 43॥
bhaktārtiśamanā bhavyā bhavabhāvavināśinī ।
sarvajñānaparītāṃgī sarvāsuravimardikā ॥ 44॥
pikasvanī sāmagītā bhavāṃkanilayā priyā ।
dīkṣā vidyādharī dīptā mahēṃdrāhitapātinī ॥ 45॥
sarvadēvamayā dakṣā samudrāṃtaravāsinī ।
akalaṃkā nirādhārā nityasiddhā nirāmayā ॥ 46॥
kāmadhēnubṛhadgarbhā dhīmatī maunanāśinī ।
niḥsaṃkalpā nirātaṃkā vinayā vinayapradā ॥ 47॥
jvālāmālā sahasrāḍhyā dēvadēvī manōmayā ।
subhagā suviśuddhā ca vasudēvasamudbhavā ॥ 48॥
mahēṃdrōpēṃdrabhaginī bhaktigamyā parāvarā ।
jñānajñēyā parātītā vēdāṃtaviṣayā matiḥ ॥ 49॥
dakṣiṇā dāhikā dahyā sarvabhūtahṛdisthitā ।
yōgamāyā vibhāgajñā mahāmōhā garīyasī ॥ 50॥
saṃdhyā sarvasamudbhūtā brahmavṛkṣāśriyāditiḥ ।
bījāṃkurasamudbhūtā mahāśaktirmahāmatiḥ ॥ 51॥
khyātiḥ prajñāvatī saṃjñā mahābhōgīṃdraśāyinī ।
hīṃkṛtiḥ śaṃkarī śāṃtirgaṃdharvagaṇasēvitā ॥ 52॥
vaiśvānarī mahāśūlā dēvasēnā bhavapriyā ।
mahārātrī parānaṃdā śacī duḥsvapnanāśinī ॥ 53॥
īḍyā jayā jagaddhātrī durvijñēyā surūpiṇī ।
guhāṃbikā gaṇōtpannā mahāpīṭhā marutsutā ॥ 54॥
havyavāhā bhavānaṃdā jagadyōniḥ prakīrtitā ।
jaganmātā jaganmṛtyurjarātītā ca buddhidā ॥ 55॥
siddhidātrī ratnagarbhā ratnagarbhāśrayā parā ।
daityahaṃtrī svēṣṭadātrī maṃgalaikasuvigrahā ॥ 56॥
puruṣāṃtargatā caiva samādhisthā tapasvinī ।
divisthitā triṇētrā ca sarvēṃdriyamanādhṛtiḥ ॥ 57॥
sarvabhūtahṛdisthā ca tathā saṃsāratāriṇī ।
vēdyā brahmavivēdyā ca mahālīlā prakīrtitā ॥ 58॥
brāhmaṇibṛhatī brāhmī brahmabhūtā'ghahāriṇī ।
hiraṇmayī mahādātrī saṃsāraparivartikā ॥ 59॥
sumālinī surūpā ca bhāsvinī dhāriṇī tathā ।
unmūlinī sarvasabhā sarvapratyayasākṣiṇī ॥ 60॥
susaumyā caṃdravadanā tāṃḍavāsaktamānasā ।
sattvaśuddhikarī śuddhā malatrayavināśinī ॥ 61॥
jagatttrayī jaganmūrtistrimūrtiramṛtāśrayā ।
vimānasthā viśōkā ca śōkanāśinyanāhatā ॥ 62॥
hēmakuṃḍalinī kālī padmavāsā sanātanī ।
sadākīrtiḥ sarvabhūtaśayā dēvī satāṃpriyā ॥ 63॥
brahmamūrtikalā caiva kṛttikā kaṃjamālinī ।
vyōmakēśā kriyāśaktiricchāśaktiḥ parāgatiḥ ॥ 64॥
kṣōbhikā khaṃḍikābhēdyā bhēdābhēdavivarjitā ।
abhinnā bhinnasaṃsthānā vaśinī vaṃśadhāriṇī ॥ 65॥
guhyaśaktirguhyatattvā sarvadā sarvatōmukhī ।
bhaginī ca nirādhārā nirāhārā prakīrtitā ॥ 66॥
niraṃkuśapadōdbhūtā cakrahastā viśōdhikā ।
sragviṇī padmasaṃbhēdakāriṇī parikīrtitā ॥ 67॥
parāvaravidhānajñā mahāpuruṣapūrvajā ।
parāvarajñā vidyā ca vidyujjihvā jitāśrayā ॥ 68॥
vidyāmayī sahasrākṣī sahasravadanātmajā ।
sahasraraśmiḥsatvasthā mahēśvarapadāśrayā ॥ 69॥
jvālinī sanmayā vyāptā cinmayā padmabhēdikā ।
mahāśrayā mahāmaṃtrā mahādēvamanōramā ॥ 70॥
vyōmalakṣmīḥ siṃharathā cēkitānā'mitaprabhā ।
viśvēśvarī bhagavatī sakalā kālahāriṇī ॥ 71॥
sarvavēdyā sarvabhadrā guhyā dūḍhā guhāraṇī ।
pralayā yōgadhātrī ca gaṃgā viśvēśvarī tathā ॥ 72॥
kāmadā kanakā kāṃtā kaṃjagarbhaprabhā tathā ।
puṇyadā kālakēśā ca bhōkttrī puṣkariṇī tathā ॥ 73॥
surēśvarī bhūtidātrī bhūtibhūṣā prakīrtitā ।
paṃcabrahmasamutpannā paramārthā'rthavigrahā ॥ 74॥
varṇōdayā bhānumūrtirvāgvijñēyā manōjavā ।
manōharā mahōraskā tāmasī vēdarūpiṇī ॥ 75॥
vēdaśaktirvēdamātā vēdavidyāprakāśinī ।
yōgēśvarēśvarī māyā mahāśaktirmahāmayī ॥ 76॥
viśvāṃtaḥsthā viyanmūrtirbhārgavī surasuṃdarī ।
surabhirnaṃdinī vidyā naṃdagōpatanūdbhavā ॥ 77॥
bhāratī paramānaṃdā parāvaravibhēdikā ।
sarvapraharaṇōpētā kāmyā kāmēśvarēśvarī ॥ 78॥
anaṃtānaṃdavibhavā hṛllēkhā kanakaprabhā ।
kūṣmāṃḍā dhanaratnāḍhyā sugaṃdhā gaṃdhadāyinī ॥ 79॥
trivikramapadōdbhūtā caturāsyā śivōdayā ।
sudurlabhā dhanādhyakṣā dhanyā piṃgalalōcanā ॥ 80॥
śāṃtā prabhāsvarūpā ca paṃkajāyatalōcanā ।
iṃdrākṣī hṛdayāṃtaḥsthā śivā mātā ca satkriyā ॥ 81॥
girijā ca sugūḍhā ca nityapuṣṭā niraṃtarā ।
durgā kātyāyanī caṃḍī caṃdrikā kāṃtavigrahā ॥ 82॥
hiraṇyavarṇā jagatī jagadyaṃtrapravartikā ।
maṃdarādrinivāsā ca śāradā svarṇamālinī ॥ 83॥
ratnamālā ratnagarbhā vyuṣṭirviśvapramāthinī ।
padmānaṃdā padmanibhā nityapuṣṭā kṛtōdbhavā ॥ 84॥
nārāyaṇī duṣṭaśikṣā sūryamātā vṛṣapriyā ।
mahēṃdrabhaginī satyā satyabhāṣā sukōmalā ॥ 85॥
vāmā ca paṃcatapasāṃ varadātrī prakīrtitā ।
vācyavarṇēśvarī vidyā durjayā duratikramā ॥ 86॥
kālarātrirmahāvēgā vīrabhadrapriyā hitā ।
bhadrakālī jaganmātā bhaktānāṃ bhadradāyinī ॥ 87॥
karālā piṃgalākārā kāmabhēttrī mahāmanāḥ ।
yaśasvinī yaśōdā ca ṣaḍadhvaparivartikā ॥ 88॥
śaṃkhinī padminī saṃkhyā sāṃkhyayōgapravartikā ।
caitrādirvatsarārūḍhā jagatsaṃpūraṇīṃdrajā ॥ 89॥
śuṃbhaghnī khēcarārādhyā kaṃbugrīvā balīḍitā ।
khagārūḍhā mahaiśvaryā supadmanilayā tathā ॥ 90॥
viraktā garuḍasthā ca jagatīhṛdguhāśrayā ।
śuṃbhādimathanā bhaktahṛdgahvaranivāsinī ॥ 91॥
jagatttrayāraṇī siddhasaṃkalpā kāmadā tathā ।
sarvavijñānadātrī cānalpakalmaṣahāriṇī ॥ 92॥
sakalōpaniṣadgamyā duṣṭaduṣprēkṣyasattamā ।
sadvṛtā lōkasaṃvyāptā tuṣṭiḥ puṣṭiḥ kriyāvatī ॥ 93॥
viśvāmarēśvarī caiva bhuktimuktipradāyinī ।
śivādhṛtā lōhitākṣī sarpamālāvibhūṣaṇā ॥ 94॥
nirānaṃdā triśūlāsidhanurbāṇādidhāriṇī ।
aśēṣadhyēyamūrtiśca dēvatānāṃ ca dēvatā ॥ 95॥
varāṃbikā girēḥ putrī niśuṃbhavinipātinī ।
suvarṇā svarṇalasitā'naṃtavarṇā sadādhṛtā ॥ 96॥
śāṃkarī śāṃtahṛdayā ahōrātravidhāyikā ।
viśvagōptrī gūḍharūpā guṇapūrṇā ca gārgyajā ॥ 97॥
gaurī śākaṃbharī satyasaṃdhā saṃdhyātrayīdhṛtā ।
sarvapāpavinirmuktā sarvabaṃdhavivarjitā ॥ 98॥
sāṃkhyayōgasamākhyātā apramēyā munīḍitā ।
viśuddhasukulōdbhūtā biṃdunādasamādṛtā ॥ 99॥
śaṃbhuvāmāṃkagā caiva śaśitulyanibhānanā ।
vanamālāvirājaṃtī anaṃtaśayanādṛtā ॥ 100॥
naranārāyaṇōdbhūtā nārasiṃhī prakīrtitā ।
daityapramāthinī śaṃkhacakrapadmagadādharā ॥ 101॥
saṃkarṣaṇasamutpannā aṃbikā sajjanāśrayā ।
suvṛtā suṃdarī caiva dharmakāmārthadāyinī ॥ 102॥
mōkṣadā bhaktinilayā purāṇapuruṣādṛtā ।
mahāvibhūtidā''rādhyā sarōjanilayā'samā ॥ 103॥
aṣṭādaśabhujā'nādirnīlōtpaladalākṣiṇī ।
sarvaśaktisamārūḍhā dharmādharmavivarjitā ॥ 104॥
vairāgyajñānaniratā nirālōkā niriṃdriyā ।
vicitragahanādhārā śāśvatasthānavāsinī ॥ 105॥
jñānēśvarī pītacēlā vēdavēdāṃgapāragā ।
manasvinī manyumātā mahāmanyusamudbhavā ॥ 106॥
amanyuramṛtāsvādā puraṃdarapariṣṭutā ।
aśōcyā bhinnaviṣayā hiraṇyarajatapriyā ॥ 107॥
hiraṇyajananī bhīmā hēmābharaṇabhūṣitā ।
vibhrājamānā durjñēyā jyōtiṣṭōmaphalapradā ॥ 108॥
mahānidrāsamutpattiranidrā satyadēvatā ।
dīrghā kakudminī piṃgajaṭādhārā manōjñadhīḥ ॥ 109॥
mahāśrayā ramōtpannā tamaḥpārē pratiṣṭhitā ।
tritattvamātā trividhā susūkṣmā padmasaṃśrayā ॥ 110॥
śāṃtyatītakalā'tītavikārā śvētacēlikā ।
citramāyā śivajñānasvarūpā daityamāthinī ॥ 111॥
kāśyapī kālasarpābhavēṇikā śāstrayōnikā ।
trayīmūrtiḥ kriyāmūrtiścaturvargā ca darśinī ॥ 112॥
nārāyaṇī narōtpannā kaumudī kāṃtidhāriṇī ।
kauśikī lalitā līlā parāvaravibhāvinī ॥ 113॥
varēṇyā'dbhutamahātmyā vaḍavā vāmalōcanā ।
subhadrā cētanārādhyā śāṃtidā śāṃtivardhinī ॥ 114॥
jayādiśaktijananī śakticakrapravartikā ।
triśaktijananī janyā ṣaṭsūtraparivarṇitā ॥ 115॥
sudhautakarmaṇā''rādhyā yugāṃtadahanātmikā ।
saṃkarṣiṇī jagaddhātrī kāmayōniḥ kirīṭinī ॥ 116॥
aiṃdrī trailōkyanamitā vaiṣṇavī paramēśvarī ।
pradyumnajananī biṃbasamōṣṭhī padmalōcanā ॥ 117॥
madōtkaṭā haṃsagatiḥ pracaṃḍā caṃḍavikramā ।
vṛṣādhīśā parātmā ca viṃdhyā parvatavāsinī ॥ 118॥
himavanmērunilayā kailāsapuravāsinī ।
cāṇūrahaṃtrī nītijñā kāmarūpā trayītanuḥ ॥ 119॥
vratasnātā dharmaśīlā siṃhāsananivāsinī ।
vīrabhadrādṛtā vīrā mahākālasamudbhavā ॥ 120॥
vidyādharārcitā siddhasādhyārādhitapādukā ।
śraddhātmikā pāvanī ca mōhinī acalātmikā ॥ 121॥
mahādbhutā vārijākṣī siṃhavāhanagāminī ।
manīṣiṇī sudhāvāṇī vīṇāvādanatatparā ॥ 122॥
śvētavāhaniṣēvyā ca lasanmatiraruṃdhatī ।
hiraṇyākṣī tathā caiva mahānaṃdapradāyinī ॥ 123॥
vasuprabhā sumālyāptakaṃdharā paṃkajānanā ।
parāvarā varārōhā sahasranayanārcitā ॥ 124॥
śrīrūpā śrīmatī śrēṣṭhā śivanāmnī śivapriyā ।
śrīpradā śritakalyāṇā śrīdharārdhaśarīriṇī ॥ 125॥
śrīkalā'naṃtadṛṣṭiśca hyakṣudrārātisūdanī ।
raktabījanihaṃtrī ca daityasaṃgavimardinī ॥ 126॥
siṃhārūḍhā siṃhikāsyā daityaśōṇitapāyinī ।
sukīrtisahitācchinnasaṃśayā rasavēdinī ॥ 127॥
guṇābhirāmā nāgārivāhanā nirjarārcitā ।
nityōditā svayaṃjyōtiḥ svarṇakāyā prakīrtitā ॥ 128॥
vajradaṃḍāṃkitā caiva tathāmṛtasaṃjīvinī ।
vajracchannā dēvadēvī varavajrasvavigrahā ॥ 129॥
māṃgalyā maṃgalātmā ca mālinī mālyadhāriṇī ।
gaṃdharvī taruṇī cāṃdrī khaḍgāyudhadharā tathā ॥ 130॥
saudāminī prajānaṃdā tathā prōktā bhṛgūdbhavā ।
ēkānaṃgā ca śāstrārthakuśalā dharmacāriṇī ॥ 131॥
dharmasarvasvavāhā ca dharmādharmaviniścayā ।
dharmaśaktirdharmamayā dhārmikānāṃ śivapradā ॥ 132॥
vidharmā viśvadharmajñā dharmārthāṃtaravigrahā ।
dharmavarṣmā dharmapūrvā dharmapāraṃgatāṃtarā ॥ 133॥
dharmōpadēṣṭrī dharmātmā dharmagamyā dharādharā ।
kapālinī śākalinī kalākalitavigrahā ॥ 134॥
sarvaśaktivimuktā ca karṇikāradharā'kṣarā।
kaṃsaprāṇaharā caiva yugadharmadharā tathā ॥ 135॥
yugapravartikā prōktā trisaṃdhyā dhyēyavigrahā ।
svargāpavargadātrī ca tathā pratyakṣadēvatā ॥ 136॥
ādityā divyagaṃdhā ca divākaranibhaprabhā ।
padmāsanagatā prōktā khaḍgabāṇaśarāsanā ॥ 137॥
śiṣṭā viśiṣṭā śiṣṭēṣṭā śiṣṭaśrēṣṭhaprapūjitā ।
śatarūpā śatāvartā vitatā rāsamōdinī ॥ 138॥
sūryēṃdunētrā pradyumnajananī suṣṭhumāyinī ।
sūryāṃtarasthitā caiva satpratiṣṭhatavigrahā ॥ 139॥
nivṛttā prōcyatē jñānapāragā parvatātmajā ।
kātyāyanī caṃḍikā ca caṃḍī haimavatī tathā ॥ 140॥
dākṣāyaṇī satī caiva bhavānī sarvamaṃgalā ।
dhūmralōcanahaṃtrī ca caṃḍamuṃḍavināśinī ॥ 141॥
yōganidrā yōgabhadrā samudratanayā tathā ।
dēvapriyaṃkarī śuddhā bhaktabhaktipravardhinī ॥ 142॥
triṇētrā caṃdramukuṭā pramathārcitapādukā ।
arjunābhīṣṭadātrī ca pāṃḍavapriyakāriṇī ॥ 143॥
kumāralālanāsaktā harabāhūpadhānikā ।
vighnēśajananī bhaktavighnastōmaprahāriṇī ॥ 144॥
susmitēṃdumukhī namyā jayāpriyasakhī tathā ।
anādinidhanā prēṣṭhā citramālyānulēpanā ॥ 145॥
kōṭicaṃdrapratīkāśā kūṭajālapramāthinī ।
kṛtyāprahāriṇī caiva māraṇōccāṭanī tathā ॥ 146॥
surāsurapravaṃdyāṃghrirmōhaghnī jñānadāyinī ।
ṣaḍvairinigrahakarī vairividrāviṇī tathā ॥ 147॥
bhūtasēvyā bhūtadātrī bhūtapīḍāvimardikā ।
nāradastutacāritrā varadēśā varapradā ॥ 148॥
vāmadēvastutā caiva kāmadā sōmaśēkharā ।
dikpālasēvitā bhavyā bhāminī bhāvadāyinī ॥ 149॥
strīsaubhāgyapradātrī ca bhōgadā rōganāśinī ।
vyōmagā bhūmigā caiva munipūjyapadāṃbujā ।
vanadurgā ca durbōdhā mahādurgā prakīrtitā ॥ 150॥
phalaśrutiḥ
itīdaṃ kīrtidaṃ bhadra durgānāmasahasrakam ।
trisaṃdhyaṃ yaḥ paṭhēnnityaṃ tasya lakṣmīḥ sthirā bhavēt ॥ 1॥
grahabhūtapiśācādipīḍā naśyatyasaṃśayam ।
bālagrahādipīḍāyāḥ śāṃtirbhavati kīrtanāt ॥ 2॥
mārikādimahārōgē paṭhatāṃ saukhyadaṃ nṛṇām ।
vyavahārē ca jayadaṃ śatrubādhānivārakam ॥ 3॥
daṃpatyōḥ kalahē prāptē mithaḥ prēmābhivardhakam ।
āyurārōgyadaṃ puṃsāṃ sarvasaṃpatpradāyakam ॥ 4॥
vidyābhivardhakaṃ nityaṃ paṭhatāmarthasādhakam ।
śubhadaṃ śubhakāryēṣu paṭhatāṃ śṛṇutāmapi ॥ 5॥
yaḥ pūjayati durgāṃ tāṃ durgānāmasahasrakaiḥ ।
puṣpaiḥ kuṃkumasammiśraiḥ sa tu yatkāṃkṣatē hṛdi ॥ 6॥
tatsarvaṃ samavāpnōti nāsti nāstyatra saṃśayaḥ ।
yanmukhē dhriyatē nityaṃ durgānāmasahasrakam ॥ 7॥
kiṃ tasyētaramaṃtraughaiḥ kāryaṃ dhanyatamasya hi ।
durgānāmasahasrasya pustakaṃ yadgṛhē bhavēt ॥ 8॥
na tatra grahabhūtādibādhā syānmaṃgalāspadē ।
tadgṛhaṃ puṇyadaṃ kṣētraṃ dēvīsānnidhyakārakam ॥ 9॥
ētasya stōtramukhyasya pāṭhakaḥ śrēṣṭhamaṃtravit ।
dēvatāyāḥ prasādēna sarvapūjyaḥ sukhī bhavēt ॥ 10॥
ityētannagarājēna kīrtitaṃ munisattama ।
guhyādguhyataraṃ stōtraṃ tvayi snēhāt prakīrtitam ॥ 11॥
bhaktāya śraddhadhānāya kēvalaṃ kīrtyatāmidam ।
hṛdi dhāraya nityaṃ tvaṃ dēvyanugrahasādhakam ॥ 12॥ ॥
iti śrīskāṃdapurāṇē skaṃdanāradasaṃvādē durgāsahasranāmastōtraṃ saṃpūrṇam ॥