ayi girinaṃdini naṃditamēdini viśvavinōdini naṃdinutē
girivaraviṃdhyaśirōdhinivāsini viṣṇuvilāsini jiṣṇunutē ।
bhagavati hē śitikaṃṭhakuṭuṃbini bhūrikuṭuṃbini bhūrikṛtē
jaya jaya hē mahiṣāsuramardini ramyakapardini śailasutē ॥ 1 ॥
suravaravarṣiṇi durdharadharṣiṇi durmukhamarṣiṇi harṣaratē
tribhuvanapōṣiṇi śaṃkaratōṣiṇi kalmaṣamōṣiṇi ghōraratē । [kilbiṣa-, ghōṣa-]
danujanirōṣiṇi ditisutarōṣiṇi durmadaśōṣiṇi siṃdhusutē
jaya jaya hē mahiṣāsuramardini ramyakapardini śailasutē ॥ 2 ॥
ayi jagadaṃba madaṃba kadaṃbavanapriyavāsini hāsaratē
śikhari śirōmaṇi tuṃgahimālaya śṛṃganijālaya madhyagatē ।
madhumadhurē madhukaiṭabhagaṃjini kaiṭabhabhaṃjini rāsaratē
jaya jaya hē mahiṣāsuramardini ramyakapardini śailasutē ॥ 3 ॥
ayi śatakhaṃḍa vikhaṃḍitaruṃḍa vituṃḍitaśuṃḍa gajādhipatē
ripugajagaṃḍa vidāraṇacaṃḍa parākramaśuṃḍa mṛgādhipatē ।
nijabhujadaṃḍa nipātitakhaṃḍa vipātitamuṃḍa bhaṭādhipatē [-caṃḍa]
jaya jaya hē mahiṣāsuramardini ramyakapardini śailasutē ॥ 4 ॥
ayi raṇadurmada śatruvadhōdita durdharanirjara śaktibhṛtē
caturavicāradhurīṇa mahāśiva dūtakṛta pramathādhipatē ।
duritadurīha durāśaya durmati dānavadūta kṛtāṃtamatē
jaya jaya hē mahiṣāsuramardini ramyakapardini śailasutē ॥ 5 ॥
ayi śaraṇāgata vairivadhūvara vīravarābhayadāyakarē
tribhuvana mastaka śūlavirōdhi śirōdhikṛtāmala śūlakarē ।
dumidumitāmara duṃdubhināda mahō mukharīkṛta tigmakarē
jaya jaya hē mahiṣāsuramardini ramyakapardini śailasutē ॥ 6 ॥
ayi nijahuṃkṛtimātra nirākṛta dhūmravilōcana dhūmraśatē
samaraviśōṣita śōṇitabīja samudbhavaśōṇita bījalatē ।
śiva śiva śuṃbha niśuṃbha mahāhava tarpita bhūta piśācaratē
jaya jaya hē mahiṣāsuramardini ramyakapardini śailasutē ॥ 7 ॥
dhanuranusaṃga raṇakṣaṇasaṃga parisphuradaṃga naṭatkaṭakē
kanaka piśaṃga pṛṣatkaniṣaṃgarasadbhaṭa śṛṃga hatāvaṭukē ।
kṛtacaturaṃga balakṣitiraṃga ghaṭadbahuraṃga raṭadbaṭukē
jaya jaya hē mahiṣāsuramardini ramyakapardini śailasutē ॥ 8 ॥
suralalanā tatathēyi tathēyi kṛtābhinayōdara nṛtyaratē
kṛta kukuthaḥ kukuthō gaḍadādikatāla kutūhala gānaratē ।
dhudhukuṭa dhukkuṭa dhiṃdhimita dhvani dhīra mṛdaṃga ninādaratē
jaya jaya hē mahiṣāsuramardini ramyakapardini śailasutē ॥ 9 ॥
jaya jaya japya jayē jaya śabdaparastuti tatpara viśvanutē
bhaṇa bhaṇa bhiṃjimi bhiṃkṛtanūpura siṃjitamōhita bhūtapatē । [jha-, jhiṃ-]
naṭitanaṭārdha naṭīnaṭanāyaka nāṭitanāṭya sugānaratē
jaya jaya hē mahiṣāsuramardini ramyakapardini śailasutē ॥ 10 ॥
ayi sumanaḥ sumanaḥ sumanaḥ sumanaḥ sumanōhara kāṃtiyutē
śrita rajanī rajanī rajanī rajanī rajanīkara vaktravṛtē ।
sunayana vibhramara bhramara bhramara bhramara bhramarādhipatē
jaya jaya hē mahiṣāsuramardini ramyakapardini śailasutē ॥ 11 ॥
sahita mahāhava mallama tallika mallita rallaka mallaratē
viracita vallika pallika mallika bhillika bhillika varga vṛtē ।
sitakṛta phullasamullasitāruṇa tallaja pallava sallalitē
jaya jaya hē mahiṣāsuramardini ramyakapardini śailasutē ॥ 12 ॥
aviralagaṃḍagalanmadamēdura mattamataṃgaja rājapatē
tribhuvanabhūṣaṇa bhūtakalānidhi rūpapayōnidhi rājasutē ।
ayi sudatījana lālasamānasa mōhanamanmatha rājasutē
jaya jaya hē mahiṣāsuramardini ramyakapardini śailasutē ॥ 13 ॥
kamaladalāmala kōmalakāṃti kalākalitāmala bhālalatē
sakalavilāsa kaḷānilaya kramakēlicalatkalahaṃsakulē ।
alikula saṃkula kuvalaya maṃḍala maulimiladbhakulāli kulē
jaya jaya hē mahiṣāsuramardini ramyakapardini śailasutē ॥ 14 ॥
karamuraḷīrava vījita kūjita lajjitakōkila maṃjumatē
milita puliṃda manōhara guṃjita raṃjitaśaila nikuṃjagatē ।
nijaguṇabhūta mahāśabarīgaṇa sadguṇasaṃbhṛta kēḷitalē
jaya jaya hē mahiṣāsuramardini ramyakapardini śailasutē ॥ 15 ॥
kaṭitaṭapīta dukūlavicitra mayūkhatiraskṛta caṃdrarucē
praṇatasurāsura mauḷimaṇisphura daṃśulasannakha caṃdrarucē ।
jitakanakācala mauḷipadōrjita nirbharakuṃjara kuṃbhakucē
jaya jaya hē mahiṣāsuramardini ramyakapardini śailasutē ॥ 16 ॥
vijita sahasrakaraika sahasrakaraika sahasrakaraikanutē
kṛta suratāraka saṃgaratāraka saṃgaratāraka sūnusutē ।
surathasamādhi samānasamādhi samādhi samādhi sujātaratē
jaya jaya hē mahiṣāsuramardini ramyakapardini śailasutē ॥ 17 ॥
padakamalaṃ karuṇānilayē varivasyati yō'nudinaṃ sa śivē
ayi kamalē kamalānilayē kamalānilayaḥ sa kathaṃ na bhavēt ।
tava padamēva paraṃpadamityanuśīlayatō mama kiṃ na śivē
jaya jaya hē mahiṣāsuramardini ramyakapardini śailasutē ॥ 18 ॥
kanakalasatkala siṃdhujalairanusiṃcinutē guṇaraṃgabhuvaṃ
bhajati sa kiṃ na śacīkucakuṃbha taṭīpariraṃbha sukhānubhavam ।
tava caraṇaṃ śaraṇaṃ karavāṇi natāmaravāṇi nivāsi śivaṃ
jaya jaya hē mahiṣāsuramardini ramyakapardini śailasutē ॥ 19 ॥
tava vimalēṃdukulaṃ vadanēṃdumalaṃ sakalaṃ nanu kūlayatē
kimu puruhūta purīṃdumukhī sumukhībhirasau vimukhīkriyatē ।
mama tu mataṃ śivanāmadhanē bhavatī kṛpayā kimuta kriyatē
jaya jaya hē mahiṣāsuramardini ramyakapardini śailasutē ॥ 20 ॥
ayi mayi dīnadayālutayā kṛpayaiva tvayā bhavitavyamumē
ayi jagatō jananī kṛpayāsi yathāsi tathā'nubhitāsiratē ।
yaducitamatra bhavatyurari kurutādurutāpamapākuru tē [mē]
jaya jaya hē mahiṣāsuramardini ramyakapardini śailasutē ॥ 21 ॥
iti śrī mahiṣāsuramardini stōtram ॥