ōṃ hrīṃ śrīṃ klīṃ sarvapūjyē dēvī maṃgaḷacaṃḍikē ।
aiṃ krūṃ phaṭ svāhētyēvaṃ cāpyēkavinśākṣarō manuḥ ॥ 1 ॥
pūjyaḥ kalpataruścaiva bhaktānāṃ sarvakāmadaḥ ।
daśalakṣajapēnaiva maṃtrasiddhirbhavēnnṛṇāṃ ॥ 2 ॥
maṃtrasiddhirbhavēd yasya sa viṣṇuḥ sarvakāmadaḥ ।
dhyānaṃca śrūyatāṃ brahman vēdōktaṃ sarva sammataṃ ॥ 3 ॥
dēvīṃ ṣōḍaśavarṣīyāṃ ramyāṃ susthirayauvanāṃ ।
sarvarūpaguṇāḍhyāṃca kōmalāṃgīṃ manōharāṃ ॥ 4 ॥
śvētacaṃpakavarṇābhāṃ caṃdrakōṭisamaprabhāṃ ।
vahniśuddhāṃśukādhānāṃ ratnabhūṣaṇabhūṣitāṃ ॥ 5 ॥
bibhratīṃ kabarībhāraṃ mallikāmālyabhūṣitaṃ ।
biṃbōṣṭīṃ sudatīṃ śuddhāṃ śaratpadmanibhānanāṃ ॥ 6 ॥
īṣaddhāsyaprasannāsyāṃ sunīlōlpalalōcanāṃ ।
jagaddhātrīṃca dātrīṃca sarvēbhyaḥ sarvasaṃpadāṃ ॥ 7 ॥
saṃsārasāgarē ghōrē pītarupāṃ varāṃ bhajē ॥ 8 ॥
dēvyāśca dhyānamityēvaṃ stavanaṃ śrūyatāṃ munē ।
prayataḥ saṃkaṭagrastō yēna tuṣṭāva śaṃkaraḥ ॥ 9 ॥
॥ śaṃkara uvāca ॥
rakṣa rakṣa jaganmātardēvi maṃgaḷacaṃḍikē ।
saṃhartrī(saṃhartri) vipadāṃ rāśērharṣamaṃgaḷakārikē ॥ 10 ॥
harṣamaṃgaḷadakṣē ca harṣamaṃgaḷacaṃḍikē ।
śubhē maṃgaḷadakṣē ca śubhamaṃgaḷacaṃḍikē ॥ 11 ॥
maṃgaḷē maṃgaḷārhē ca sarvamaṃgaḷamaṃgaḷē ।
satāṃ maṃgaḷadē dēvi sarvēṣāṃ maṃgaḷālayē ॥ 12 ॥
pūjyā maṃgaḷavārē ca maṃgaḷābhīṣṭadaivatē ।
pūjyē maṃgaḷabhūpasya manuvaṃśasya saṃtatam ॥ 13 ॥
maṃgaḷādhiṣṭhātṛdēvi maṃgaḷānāṃ ca maṃgaḷē ।
saṃsāra maṃgaḷādhārē mōkṣamaṃgaḷadāyini ॥ 14 ॥
sārē ca maṃgaḷādhārē pārētvaṃ sarvakarmaṇāṃ ।
pratimaṃgaḷavārē ca pūjyē tvaṃ maṃgaḷapradē ॥ 15 ॥
stōtrēṇānēna śaṃbhuśca stutvā maṃgaḷacaṃḍikām ।
pratimaṃgaḷavārē ca pūjāṃ kṛtvāgataḥ śivaḥ ॥ 16 ॥
dēvyāśca maṃgaḷastōtraṃ yaḥ śṛṇōti samāhitaḥ ।
tanmaṃgaḷaṃ bhavēcchaśvanna bhavēt tadmaṃgaḷaṃ ॥ 17 ॥
prathamē pūjitā dēvī śaṃbhunā sarvamaṃgaḷā ।
dvitīyē pūjitā dēvī maṃgaḷēna grahēṇa ca ॥ 18 ॥
tṛtīyē pūjitā bhadrā maṃgaḷēna nṛpēṇa ca ।
caturthē maṃgaḷē vārē suṃdarībhiśca pūjitā
paṃcamē maṃgaḷākāṃkṣairnarairmaṃgaḷacaṃḍikā ॥ 19 ॥
pūjitā prativiśvēṣu viśvēśaiḥ pūjitā sadā ।
tataḥ sarvatra saṃpūjya sā babhūva surēśvarī ॥ 20 ॥
dēvādibhiśca munibhirmanubhirmānavairmunē ।
dēvyāśca maṃgaḷastōtraṃ yaḥ śṛṇōti samāhitaḥ ॥ 21 ॥
tanmaṃgaḷaṃ bhavēcchaśvanna bhavēttadmaṃgaḷaṃ ।
varddhaṃtē tatputrapautrā maṃgaḷaṃ ca dinē dinē ॥ 22 ॥
॥ iti śrī brahmavaivartē dvitīyē prakṛtikhaṃḍē nārada nārāyaṇasaṃvādē maṃgaḷōpākhānē tatstōtrādikathanaṃ nāma catuścatvāriṃśattamō'dhyāyē maṃgaḷacaṃḍikā stōtraṃ saṃpūrṇaṃ ॥