(brahmavaivarta mahāpurāṇāṃtargataṃ)

bhṛguruvāca ।
brahmanbrahmavidāṃśrēṣṭha brahmajñānaviśārada ।
sarvajña sarvajanaka sarvapūjakapūjita ॥

sarasvatyāśca kavacaṃ brūhi viśvajayaṃ prabhō ।
ayātayāmamaṃtrāṇāṃ samūhō yatra saṃyutaḥ ॥

brahmōvāca ।
śṛṇu vatsa pravakṣyāmi kavacaṃ sarvakāmadam ।
śrutisāraṃ śrutisukhaṃ śrutyuktaṃ śrutipūjitam ॥

uktaṃ kṛṣṇēna gōlōkē mahyaṃ vṛṃdāvanē vanē ।
rāsēśvarēṇa vibhunā rāsē vai rāsamaṃḍalē ॥

atīva gōpanīyaṃca kalpavṛkṣasamaṃ param ।
aśrutādbhutamaṃtrāṇāṃ samūhaiśca samanvitam ॥

yaddhṛtvā paṭhanādbrahmanbuddhimāṃśca bṛhaspatiḥ ।
yaddhṛtvā bhagavāṃchukraḥ sarvadaityēṣu pūjitaḥ ॥

paṭhanāddhāraṇādvāgmī kavīṃdrō vālmikī muniḥ ।
svāyaṃbhuvō manuścaiva yaddhṛtvā sarvapūjitāḥ ॥

kaṇādō gautamaḥ kaṇvaḥ pāṇiniḥ śākaṭāyanaḥ ।
graṃthaṃ cakāra yaddhṛtvā dakṣaḥ kātyāyanaḥ svayam ॥

dhṛtvā vēdavibhāgaṃca purāṇānyakhilāni ca ।
cakāra līlāmātrēṇa kṛṣṇadvaipāyanaḥ svayam ॥

śātātapaśca saṃvartō vasiṣṭhaśca parāśaraḥ ।
yaddhṛtvā paṭhanādgraṃthaṃ yājñavalkyaścakāra saḥ ॥

ṛṣyaśṛṃgō bharadvājaścāstīkō dēvalastathā ।
jaigīṣavyō'tha jābāliryaddhṛtvā sarvapūjitaḥ ॥

kavacasyāsya viprēṃdra ṛṣirēṣa prajāpatiḥ ।
svayaṃ bṛhaspatiśchaṃdō dēvō rāsēśvaraḥ prabhuḥ ॥

sarvatattvaparijñānē sarvārthē'pi ca sādhanē ।
kavitāsu ca sarvāsu viniyōgaḥ prakīrtitaḥ ॥

( kavacaṃ )
ōṃ hrīṃ sarasvatyai svāhā śirō mē pātu sarvataḥ ।
śrīṃ vāgdēvatāyai svāhā bhālaṃ mē sarvadā'vatu ॥

ōṃ hrīṃ sarasvatyai svāhēti śrōtrē pātu niraṃtaram ।
ōṃ śrīṃ hrīṃ bhagavatyai sarasvatyai svāhā nētrayugmaṃ sadā'vatu ॥

aiṃ hrīṃ vāgvādinyai svāhā nāsāṃ mē sarvadā'vatu ।
hrīṃ vidyādhiṣṭhātṛdēvyai svāhā cōṃṣṭha sadā'vatu ॥

ōṃ śrīṃ hrīṃ brāhmyai svāhēti daṃtapaṃktiṃ sadā'vatu ।
aimityēkākṣarō maṃtrō mama kaṃṭhaṃ sadā'vatu ॥

ōṃ śrīṃ hrīṃ pātu mē grīvāṃ skaṃdhaṃ mē śrīṃ sadā'vatu ।
ōṃ hrīṃ vidyādhiṣṭhātṛdēvyai svāhā vakṣaḥ sadā'vatu ॥

ōṃ hrīṃ vidyāsvarūpāyai svāhā mē pātu nābhikām ।
ōṃ hrīṃ klīṃ vāṇyai svāhēti mama pṛṣṭhaṃ sadā'vatu ॥

ōṃ sarvavarṇātmikāyai pādayugmaṃ sadā'vatu ।
ōṃ rāgādhiṣṭhātṛdēvyai sarvāṃgaṃ mē sadā'vatu ॥

ōṃ sarvakaṃṭhavāsinyai svāhā pracyāṃ sadā'vatu ।
ōṃ hrīṃ jihvāgravāsinyai svāhā'gnidiśi rakṣatu ॥

ōṃ aiṃ hrīṃ śrīṃ sarasvatyai budhajananyai svāhā ।
satataṃ maṃtrarājō'yaṃ dakṣiṇē māṃ sadā'vatu ॥

ōṃ hrīṃ śrīṃ tryakṣarō maṃtrō nairṛtyāṃ mē sadā'vatu ।
kavijihvāgravāsinyai svāhā māṃ vāruṇē'vatu ॥

ōṃ sadaṃbikāyai svāhā vāyavyē māṃ sadā'vatu ।
ōṃ gadyapadyavāsinyai svāhā māmuttarē'vatu ॥

ōṃ sarvaśāstravāsinyai svāhaiśānyāṃ sadā'vatu ।
ōṃ hrīṃ sarvapūjitāyai svāhā cōrdhvaṃ sadā'vatu ॥

aiṃ hrīṃ pustakavāsinyai svāhā'dhō māṃ sadāvatu ।
ōṃ graṃthabījarūpāyai svāhā māṃ sarvatō'vatu ॥

iti tē kathitaṃ vipra sarvamaṃtraughavigraham ।
idaṃ viśvajayaṃ nāma kavacaṃ brahmārūpakam ॥

purā śrutaṃ dharmavaktrātparvatē gaṃdhamādanē ।
tava snēhānmayā''khyātaṃ pravaktavyaṃ na kasyacit ॥

gurumabhyarcya vidhivadvastrālaṃkāracaṃdanaiḥ ।
praṇamya daṃḍavadbhūmau kavacaṃ dhārayētsudhīḥ ॥

paṃcalakṣajapēnaiva siddhaṃ tu kavacaṃ bhavēt ।
yadi syātsiddhakavacō bṛhaspati samō bhavēt ॥

mahāvāgmī kavīṃdraśca trailōkyavijayī bhavēt ।
śaknōti sarvaṃ jētuṃ sa kavacasya prabhāvataḥ ॥

idaṃ tē kāṇvaśākhōktaṃ kathitaṃ kavacaṃ munē ।
stōtraṃ pūjāvidhānaṃ ca dhyānaṃ vai vaṃdanaṃ tathā ॥

iti śrī brahmavaivartē mahāpurāṇē prakṛtikhaṃḍē nāradanārāyaṇasaṃvādē sarasvatīkavacaṃ nāma caturthō'dhyāyaḥ ।