vaṃdē vaṃdāru maṃdāramiṃdirānaṃdakaṃdalam ।
amaṃdānaṃdasaṃdōha baṃdhuraṃ siṃdhurānanam ॥

aṃgaṃ harēḥ pulakabhūṣaṇamāśrayaṃtī
bhṛṃgāṃganēva mukuḷābharaṇaṃ tamālam ।
aṃgīkṛtākhilavibhūtirapāṃgalīlā
māṃgaḷyadāstu mama maṃgaḷadēvatāyāḥ ॥ 1 ॥

mugdhā muhurvidadhatī vadanē murārēḥ
prēmatrapāpraṇihitāni gatāgatāni ।
mālā dṛśōrmadhukarīva mahōtpalē yā
sā mē śriyaṃ diśatu sāgarasaṃbhavāyāḥ ॥ 2 ॥

āmīlitākṣamadhigamya mudā mukuṃdaṃ-
ānaṃdakaṃdamanimēṣamanaṃgataṃtram ।
ākēkarasthitakanīnikapakṣmanētraṃ
bhūtyai bhavēnmama bhujaṃgaśayāṃganāyāḥ ॥ 3 ॥

bāhvaṃtarē madhujitaḥ śritakaustubhē yā
hārāvaḷīva harinīlamayī vibhāti ।
kāmapradā bhagavatō'pi kaṭākṣamālā
kaḷyāṇamāvahatu mē kamalālayāyāḥ ॥ 4 ॥

kālāṃbudāḷilalitōrasi kaiṭabhārēḥ
dhārādharē sphurati yā taṭidaṃganēva ।
mātussamastajagatāṃ mahanīyamūrtiḥ
bhadrāṇi mē diśatu bhārgavanaṃdanāyāḥ ॥ 5 ॥

prāptaṃ padaṃ prathamataḥ khalu yatprabhāvāt
māṃgaḷyabhāji madhumāthini manmathēna ।
mayyāpatēttadiha maṃtharamīkṣaṇārdhaṃ
maṃdālasaṃ ca makarālayakanyakāyāḥ ॥ 6 ॥

viśvāmarēṃdrapadavibhramadānadakṣaṃ
ānaṃdahēturadhikaṃ muravidviṣō'pi ।
īṣanniṣīdatu mayi kṣaṇamīkṣaṇārthaṃ
iṃdīvarōdarasahōdaramiṃdirāyāḥ ॥ 7 ॥

iṣṭā viśiṣṭamatayō'pi yayā dayārdra
dṛṣṭyā triviṣṭapapadaṃ sulabhaṃ labhaṃtē ।
dṛṣṭiḥ prahṛṣṭa kamalōdaradīptiriṣṭāṃ
puṣṭiṃ kṛṣīṣṭa mama puṣkaraviṣṭarāyāḥ ॥ 8 ॥

dadyāddayānupavanō draviṇāṃbudhārā-
masminna kiṃcana vihaṃgaśiśau viṣaṇṇē ।
duṣkarmagharmamapanīya cirāya dūraṃ
nārāyaṇapraṇayinīnayanāṃbuvāhaḥ ॥ 9 ॥

gīrdēvatēti garuḍadhvajasuṃdarīti
śākaṃbharīti śaśiśēkharavallabhēti ।
sṛṣṭisthitipraḷayakēliṣu saṃsthitāyai
tasyai namastribhuvanaikagurōstaruṇyai ॥ 10 ॥

śrutyai namō'stu śubhakarmaphalaprasūtyai
ratyai namō'stu ramaṇīyaguṇārṇavāyai ।
śaktyai namō'stu śatapatranikētanāyai
puṣṭyai namō'stu puruṣōttamavallabhāyai ॥ 11 ॥

namō'stu nāḷīkanibhānanāyai
namō'stu dugdhōdadhijanmabhūmyai ।
namō'stu sōmāmṛtasōdarāyai
namō'stu nārāyaṇavallabhāyai ॥ 12 ॥

namō'stu hēmāṃbujapīṭhikāyai
namō'stu bhūmaṃḍalanāyikāyai ।
namō'stu dēvādidayāparāyai
namō'stu śāraṃgāyudhavallabhāyai ॥ 13 ॥

namō'stu dēvyai bhṛgunaṃdanāyai
namō'stu viṣṇōrurasisthitāyai ।
namō'stu lakṣmyai kamalālayāyai
namō'stu dāmōdaravallabhāyai ॥ 14 ॥

namō'stu kāṃtyai kamalēkṣaṇāyai
namō'stu bhūtyai bhuvanaprasūtyai ।
namō'stu dēvādibhirarcitāyai
namō'stu naṃdātmajavallabhāyai ॥ 15 ॥

saṃpatkarāṇi sakalēṃdriyanaṃdanāni
sāmrājyadānavibhavāni sarōruhākṣi ।
tvadvaṃdanāni duritōddharaṇōdyatāni
māmēva mātaraniśaṃ kalayaṃtu nānyē ॥ 16 ॥

yatkaṭākṣasamupāsanāvidhiḥ
sēvakasya sakalārthasaṃpadaḥ ।
saṃtanōti vacanāṃgamānasaiḥ
tvāṃ murārihṛdayēśvarīṃ bhajē ॥ 17 ॥

sarasijanilayē sarōjahastē
dhavaḷatamāṃśukagaṃdhamālyaśōbhē ।
bhagavati harivallabhē manōjñē
tribhuvanabhūtikari prasīda mahyam ॥ 18 ॥

digghastibhiḥ kanakakuṃbhamukhāvasṛṣṭa
svarvāhinī vimalacārujalaplutāṃgīm ।
prātarnamāmi jagatāṃ jananīmaśēṣa-
lōkādhināthagṛhiṇīṃ amṛtābdhiputrīm ॥ 19 ॥

kamalē kamalākṣavallabhē tvaṃ
karuṇāpūrataraṃgitairapāṃgaiḥ ।
avalōkaya māmakiṃcanānāṃ
prathamaṃ pātramakṛtrimaṃ dayāyāḥ ॥ 20 ॥

stuvaṃti yē stutibhiramūbhiranvahaṃ
trayīmayīṃ tribhuvanamātaraṃ ramām ।
guṇādhikā gurutarabhāgyabhāginaḥ
bhavaṃti tē bhuvi budhabhāvitāśayāḥ ॥ 21 ॥

suvarṇadhārāstōtraṃ yacchaṃkarācārya nirmitam ।
trisaṃdhyaṃ yaḥ paṭhēnnityaṃ sa kubērasamō bhavēt ॥

iti śrīmacchaṃkarabhagavataḥ kṛtau kanakadhārāstōtraṃ saṃpūrṇam ।