namaḥ śriyai lōkadhātryai brahmamātrē namō namaḥ |
namastē padmanētrāyai padmamukhyai namō namaḥ || 1 ||

prasannamukhapadmāyai padmakāṃtyai namō namaḥ |
namō bilvavanasthāyai viṣṇupatnyai namō namaḥ || 2 ||

vicitrakṣaumadhāriṇyai pṛthuśrōṇyai namō namaḥ |
pakvabilvaphalāpīnatuṃgastanyai namō namaḥ || 3 ||

suraktapadmapatrābhakarapādatalē śubhē |
suratnāṃgadakēyūrakāṃcīnūpuraśōbhitē |
yakṣakardamasaṃliptasarvāṃgē kaṭakōjjvalē || 4 ||

māṃgalyābharaṇaiścitrairmuktāhārairvibhūṣitē |
tāṭaṃkairavataṃsaiśca śōbhamānamukhāṃbujē || 5 ||

padmahastē namastubhyaṃ prasīda harivallabhē |
ṛgyajussāmarūpāyai vidyāyai tē namō namaḥ || 6 ||

prasīdāsmān kṛpādṛṣṭipātairālōkayābdhijē |
yē dṛṣṭāstē tvayā brahmarudrēṃdratvaṃ samāpnuyuḥ || 7 ||

iti śrīvarāhapurāṇē śrīvēṃkaṭācalamāhātmyē navamō'dhyāyē
dēvādikṛta śrīlakṣmī stutirnāma mahālakṣmī caturviṃśati nāma stōtram ||