Śrī Siddhalakṣmī Stōtraṃ

asya śrīsiddhalakṣmīstōtramaṃtrasya hiraṇyagarbha ṛṣiḥ anuṣṭup chaṃdaḥ,
śrīmahākāḷī mahālakṣmī mahāsarasvatyō dēvatāḥ śrīṃ bījaṃ hrīṃ śaktiḥ klīṃ kīlakaṃ
mama sarvaklēśapīḍāparihārārthaṃ sarvaduḥkhadāridryanāśanārthaṃ
sarvakāryasiddhyarthaṃ śrīsiddhilakṣmīstōtra pāṭhē viniyōgaḥ ॥

ṛṣyādinyāsaḥ

ōṃ hiraṇyagarbha ṛṣayē namaḥ śirasi ।
anuṣṭupchaṃdasē namō mukhē ।
śrīmahākāḷīmahālakṣmīmahāsarasvatīdēvatābhyō namō hṛdiḥ ।
śrīṃ bījāya namō guhyē ।
hrīṃ śaktayē namaḥ pādayōḥ ।
klīṃ kīlakāya namō nābhau ।
viniyōgāya namaḥ sarvāṃgēṣu ॥

karanyāsaḥ

ōṃ śrīṃ siddhalakṣmyai aṃguṣṭhābhyāṃ namaḥ ।
ōṃ hrīṃ viṣṇutējasē tarjanībhyāṃ namaḥ ।
ōṃ klīṃ amṛtānaṃdāyai madhyamābhyāṃ namaḥ ।
ōṃ śrīṃ daityamālinyai anāmikābhyāṃ namaḥ ।
ōṃ hrīṃ tējaḥ prakāśinyai kaniṣṭhikābhyāṃ namaḥ ।
ōṃ klīṃ brāhmyai vaiṣṇavyai rudrāṇyai karatalakarapṛṣṭhābhyāṃ namaḥ ॥

aṃganyāsaḥ

ōṃ śrīṃ siddhalakṣmyai hṛdayāya namaḥ ।
ōṃ hrīṃ viṣṇutējasē śirasē svāhā ।
ōṃ klīṃ amṛtānaṃdāyai śikhāyai vaṣaṭ ।
ōṃ śrīṃ daityamālinyai kavacāya hum ।
ōṃ hrīṃ tējaḥ prakāśinyai nētratrayāya vauṣaṭ ।
ōṃ klīṃ brāhmyai vaiṣṇavyai rudrāṇyai astrāya phaṭ ॥

ōṃ śrīṃ hrīṃ klīṃ śrīṃ siddhalakṣmyai namaḥ iti digbaṃdhaḥ ॥

atha dhyānaṃ

brāhmīṃ ca vaiṣṇavīṃ bhadrāṃ ṣaḍbhujāṃ ca caturmukhīm ।
trinētrāṃ khaḍgatriśūlapadmacakragadādharām ॥ 1 ॥

pītāṃbaradharāṃ dēvīṃ nānālaṃkārabhūṣitām ।
tējaḥpuṃjadharīṃ śrēṣṭhāṃ dhyāyēdbālakumārikām ॥ 2 ॥

atha stōtraṃ

ōṃkāraṃ lakṣmīrūpaṃ tu viṣṇuṃ vāgbhavamavyayam ।
viṣṇumānaṃdamavyaktaṃ hrīṃkāraṃ bījarūpiṇīm ॥ 3 ॥

klīṃ amṛtānaṃdinīṃ bhadrāṃ satyānaṃdadāyinīm ।
śrīṃ daityaśamanīṃ śaktiṃ mālinīṃ śatrumardinīm ॥ 4 ॥

tējaḥ prakāśinīṃ dēvīṃ varadāṃ śubhakāriṇīm ।
brāhmīṃ ca vaiṣṇavīṃ raudrīṃ kālikārūpaśōbhinīm ॥ 5 ॥

akārē lakṣmīrūpaṃ tu ukārē viṣṇumavyayam ।
makāraḥ puruṣō'vyaktō dēvī praṇava ucyatē ॥ 6 ॥

sūryakōṭipratīkāśaṃ caṃdrakōṭisamaprabham ।
tanmadhyē nikaraṃ sūkṣmaṃ brahmarupaṃ vyavasthitam ॥ 7 ॥

ōṃkāraṃ paramānaṃdaṃ sadaiva surasuṃdarīm ।
siddhalakṣmī mōkṣalakṣmī ādyalakṣmī namō'stu tē ॥ 8 ॥

śrīṃkāraṃ paramaṃ siddhaṃ sarvabuddhipradāyakam ।
saubhāgyā'mṛtā kamalā satyalakṣmī namō'stu tē ॥ 9 ॥

hrīṃkāraṃ paramaṃ śuddhaṃ paramaiśvaryadāyakam ।
kamalā dhanadā lakṣmī bhōgalakṣmī namō'stu tē ॥ 10 ॥

klīṃkāraṃ kāmarūpiṇyaṃ kāmanāparipūrtidam ।
capalā caṃcalā lakṣmī kātyāyanī namō'stu tē ॥ 11 ॥

śrīṃkāraṃ siddhirūpiṇyaṃ sarvasiddhipradāyakam ।
padmānanāṃ jaganmātrē aṣṭalakṣmīṃ namō'stu tē ॥ 12 ॥

sarvamaṃgaḷamāṃgaḷyē śivē sarvārthasādhikē ।
śaraṇyē tryaṃbakē gauri nārāyaṇī namō'stu tē ॥ 13 ॥

prathamaṃ tryaṃbakā gaurī dvitīyaṃ vaiṣṇavī tathā ।
tṛtīyaṃ kamalā prōktā caturthaṃ suṃdarī tathā ॥ 14 ॥

paṃcamaṃ viṣṇuśaktiśca ṣaṣṭhaṃ kātyāyanī tathā ।
vārāhī saptamaṃ caiva hyaṣṭamaṃ harivallabhā ॥ 15 ॥

navamaṃ khaḍginī prōktā daśamaṃ caiva dēvikā ।
ēkādaśaṃ siddhalakṣmīrdvādaśaṃ haṃsavāhinī ॥ 16 ॥

uttaranyāsaḥ

atha phalaśṛtiḥ

ētat stōtravaraṃ dēvyā yē paṭhaṃti sadā narāḥ ।
sarvāpadbhyō vimucyaṃtē nātra kāryā vicāraṇā ॥ 17 ॥

ēkamāsaṃ dvimāsaṃ ca trimāsaṃ ca catusthathā ।
paṃcamāsaṃ ca ṣaṇmāsaṃ trikālaṃ yaḥ sadā paṭhēt ॥ 18 ॥

brāhmaṇaḥ klēśitō duḥkhī dāridryabhayapīḍitaḥ ।
janmāṃtara sahasrōtthairmucyatē sarvakilbaṣaiḥ ॥ 19 ॥

daridrō labhatē lakṣmīmaputraḥ putravān bhavēt ।
dhanyō yaśasvī śatrughnō vahnicaurabhayēṣu ca ॥ 20 ॥

śākinī bhūta vētāla sarpa vyāghra nipātanē ।
rājadvārē sabhāsthānē kārāgṛhanibaṃdhanē ॥ 21 ॥

īśvarēṇa kṛtaṃ stōtraṃ prāṇināṃ hitakārakam ।
stuvaṃtu brāhmaṇāḥ nityaṃ dāridryaṃ na ca bādhatē ॥ 22 ॥

sarvapāpaharā lakṣmīḥ sarvasiddhipradāyinīm ।
sādhakāḥ labhatē sarvaṃ paṭhēt stōtraṃ niraṃtaram ॥ 23 ॥

prārthana

yā śrīḥ padmavanē kadaṃbaśikharē rājagṛhē kuṃjarē
śvētē cāśvayutē vṛṣē ca yugalē yajñē ca yūpasthitē ।
śaṃkhē daivakulē narēṃdrabhavanē gaṃgātaṭē gōkulē
sā śrīstiṣṭhatu sarvadā mama gṛhē bhūyāt sadā niścalā ॥

yā sā padmāsanasthā vipulakaṭitaṭī padmapatrāyatākṣī
gaṃbhīrāvartanābhiḥ stanabharanamitā śuddhavastrōttarīyā ।
lakṣmīrdivyairgajēṃdrairmaṇigaṇakhacitaiḥ snāpitā hēmakuṃbhaiḥ
nityaṃ sā padmahastā mama vasatu gṛhē sarvamāṃgaḷyayuktā ॥

iti śrī brahmapurāṇē īśvaraviṣṇusaṃvādē śrī siddhalakṣmī stōtram ॥