sadā bālarūpā'pi vighnādrihaṃtrī
mahādaṃtivaktrā'pi paṃcāsyamānyā ।
vidhīṃdrādimṛgyā gaṇēśābhidhā mē
vidhattāṃ śriyaṃ kā'pi kaḷyāṇamūrtiḥ ॥ 1 ॥
na jānāmi śabdaṃ na jānāmi cārthaṃ
na jānāmi padyaṃ na jānāmi gadyam ।
cidēkā ṣaḍāsyā hṛdi dyōtatē mē
mukhānniḥsaraṃtē giraścāpi citram ॥ 2 ॥
mayūrādhirūḍhaṃ mahāvākyagūḍhaṃ
manōhāridēhaṃ mahaccittagēham ।
mahīdēvadēvaṃ mahāvēdabhāvaṃ
mahādēvabālaṃ bhajē lōkapālam ॥ 3 ॥
yadā saṃnidhānaṃ gatā mānavā mē
bhavāṃbhōdhipāraṃ gatāstē tadaiva ।
iti vyaṃjayansiṃdhutīrē ya āstē
tamīḍē pavitraṃ parāśaktiputram ॥ 4 ॥
yathābdhēstaraṃgā layaṃ yāṃti tuṃgā-
stathaivāpadaḥ saṃnidhau sēvatāṃ mē ।
itīvōrmipaṃktīrnṛṇāṃ darśayaṃtaṃ
sadā bhāvayē hṛtsarōjē guhaṃ tam ॥ 5 ॥
girau mannivāsē narā yē'dhirūḍhā-
stadā parvatē rājatē tē'dhirūḍhāḥ ।
itīva bruvangaṃdhaśailādhirūḍhaḥ
sa dēvō mudē mē sadā ṣaṇmukhō'stu ॥ 6 ॥
mahāṃbhōdhitīrē mahāpāpacōrē
munīṃdrānukūlē sugaṃdhākhyaśailē ।
guhāyāṃ vasaṃtaṃ svabhāsā lasaṃtaṃ
janārtiṃ haraṃtaṃ śrayāmō guhaṃ tam ॥ 7 ॥
lasatsvarṇagēhē nṛṇāṃ kāmadōhē
sumastōmasaṃchannamāṇikyamaṃcē ।
samudyatsahasrārkatulyaprakāśaṃ
sadā bhāvayē kārtikēyaṃ surēśam ॥ 8 ॥
raṇaddhaṃsakē maṃjulē'tyaṃtaśōṇē
manōhārilāvaṇyapīyūṣapūrṇē ।
manaḥṣaṭpadō mē bhavaklēśataptaḥ
sadā mōdatāṃ skaṃda tē pādapadmē ॥ 9 ॥
suvarṇābhadivyāṃbarairbhāsamānāṃ
kvaṇatkiṃkiṇīmēkhalāśōbhamānām ।
lasaddhēmapaṭṭēna vidyōtamānāṃ
kaṭiṃ bhāvayē skaṃda tē dīpyamānām ॥ 10 ॥
puliṃdēśakanyāghanābhōgatuṃga-
stanāliṃganāsaktakāśmīrarāgam ।
namasyāmyahaṃ tārakārē tavōraḥ
svabhaktāvanē sarvadā sānurāgam ॥ 11 ॥
vidhau klṛptadaṃḍānsvalīlādhṛtāṃḍā-
nnirastēbhaśuṃḍāṃdviṣatkāladaṃḍān ।
hatēṃdrāriṣaṃḍānjagatrāṇaśauṃḍā-
nsadā tē pracaṃḍānśrayē bāhudaṃḍān ॥ 12 ॥
sadā śāradāḥ ṣaṇmṛgāṃkā yadi syuḥ
samudyaṃta ēva sthitāścētsamaṃtāt ।
sadā pūrṇabiṃbāḥ kaḷaṃkaiśca hīnā-
stadā tvanmukhānāṃ bruvē skaṃda sāmyam ॥ 13 ॥
sphuranmaṃdahāsaiḥ sahaṃsāni caṃca-
tkaṭākṣāvalībhṛṃgasaṃghōjjvalāni ।
sudhāsyaṃdibiṃbādharāṇīśasūnō
tavālōkayē ṣaṇmukhāṃbhōruhāṇi ॥ 14 ॥
viśālēṣu karṇāṃtadīrghēṣvajasraṃ
dayāsyaṃdiṣu dvādaśasvīkṣaṇēṣu ।
mayīṣatkaṭākṣaḥ sakṛtpātitaścē-
dbhavēttē dayāśīla kā nāma hāniḥ ॥ 15 ॥
sutāṃgōdbhavō mē'si jīvēti ṣaḍdhā
japanmaṃtramīśō mudā jighratē yān ।
jagadbhārabhṛdbhyō jagannātha tēbhyaḥ
kirīṭōjjvalēbhyō namō mastakēbhyaḥ ॥ 16 ॥
sphuradratnakēyūrahārābhirāma-
ścalatkuṃḍalaŚrīlasadgaṃḍabhāgaḥ ।
kaṭau pītavāsāḥ karē cāruśaktiḥ
purastānmamāstāṃ purārēstanūjaḥ ॥ 17 ॥
ihāyāhi vatsēti hastānprasāryā-
hvayatyādarācchaṃkarē māturaṃkāt ।
samutpatya tātaṃ śrayaṃtaṃ kumāraṃ
harāśliṣṭagātraṃ bhajē bālamūrtim ॥ 18 ॥
kumārēśasūnō guha skaṃda sēnā-
patē śaktipāṇē mayūrādhirūḍha ।
puliṃdātmajākāṃta bhaktārtihārin
prabhō tārakārē sadā rakṣa māṃ tvam ॥ 19 ॥
praśāṃtēṃdriyē naṣṭasaṃjñē vicēṣṭē
kaphōdgārivaktrē bhayōtkaṃpigātrē ।
prayāṇōnmukhē mayyanāthē tadānīṃ
drutaṃ mē dayālō bhavāgrē guha tvam ॥ 20 ॥
kṛtāṃtasya dūtēṣu caṃḍēṣu kōpā-
ddahacchiṃddhi bhiṃddhīti māṃ tarjayatsu ।
mayūraṃ samāruhya mā bhairiti tvaṃ
puraḥ śaktipāṇirmamāyāhi śīghram ॥ 21 ॥
praṇamyāsakṛtpādayōstē patitvā
prasādya prabhō prārthayē'nēkavāram ।
na vaktuṃ kṣamō'haṃ tadānīṃ kṛpābdhē
na kāryāṃtakālē manāgapyupēkṣā ॥ 22 ॥
sahasrāṃḍabhōktā tvayā śūranāmā
hatastārakaḥ siṃhavaktraśca daityaḥ ।
mamāṃtarhṛdisthaṃ manaḥklēśamēkaṃ
na haṃsi prabhō kiṃ karōmi kva yāmi ॥ 23 ॥
ahaṃ sarvadā duḥkhabhārāvasannō
bhavāṃdīnabaṃdhustvadanyaṃ na yācē ।
bhavadbhaktirōdhaṃ sadā klṛptabādhaṃ
mamādhiṃ drutaṃ nāśayōmāsuta tvam ॥ 24 ॥
apasmārakuṣṭakṣayārśaḥ pramēha-
jvarōnmādagulmādirōgā mahāṃtaḥ ।
piśācāśca sarvē bhavatpatrabhūtiṃ
vilōkya kṣaṇāttārakārē dravaṃtē ॥ 25 ॥
dṛśi skaṃdamūrtiḥ śrutau skaṃdakīrti-
rmukhē mē pavitraṃ sadā taccaritram ।
karē tasya kṛtyaṃ vapustasya bhṛtyaṃ
guhē saṃtu līnā mamāśēṣabhāvāḥ ॥ 26 ॥
munīnāmutāhō nṛṇāṃ bhaktibhājā-
mabhīṣṭapradāḥ saṃti sarvatra dēvāḥ ।
nṛṇāmaṃtyajānāmapi svārthadānē
guhāddēvamanyaṃ na jānē na jānē ॥ 27 ॥
kalatraṃ sutā baṃdhuvargaḥ paśurvā
narō vātha nārī gṛhē yē madīyāḥ ।
yajaṃtō namaṃtaḥ stuvaṃtō bhavaṃtaṃ
smaraṃtaśca tē saṃtu sarvē kumāra ॥ 28 ॥
mṛgāḥ pakṣiṇō daṃśakā yē ca duṣṭā-
stathā vyādhayō bādhakā yē madaṃgē ।
bhavacchaktitīkṣṇāgrabhinnāḥ sudūrē
vinaśyaṃtu tē cūrṇitakrauṃcaśaila ॥ 29 ॥
janitrī pitā ca svaputrāparādhaṃ
sahētē na kiṃ dēvasēnādhinātha ।
ahaṃ cātibālō bhavān lōkatātaḥ
kṣamasvāparādhaṃ samastaṃ mahēśa ॥ 30 ॥
namaḥ kēkinē śaktayē cāpi tubhyaṃ
namaśchāga tubhyaṃ namaḥ kukkuṭāya ।
namaḥ siṃdhavē siṃdhudēśāya tubhyaṃ
punaḥ skaṃdamūrtē namastē namō'stu ॥ 31 ॥
jayānaṃdabhūmaṃ jayāpāradhāmaṃ
jayāmōghakīrtē jayānaṃdamūrtē ।
jayānaṃdasiṃdhō jayāśēṣabaṃdhō
jaya tvaṃ sadā muktidānēśasūnō ॥ 32 ॥
bhujaṃgākhyavṛttēna klṛptaṃ stavaṃ yaḥ
paṭhēdbhaktiyuktō guhaṃ saṃpraṇamya ।
sa putrānkalatraṃ dhanaṃ dīrghamāyu-
rlabhētskaṃdasāyujyamaṃtē naraḥ saḥ ॥ 33 ॥