Śrī Vaidyanāthāṣṭakam

śrī rāma-saumitri-jaṭāyu-veda
ṣaḍ-ānanāditya-kujārcitāya
śrī-nīlakaṇṭhāya dayāmayāya
śrī-vaidyānāthāya namaśśivāya ॥ 1 ॥

gaṅgā-pravāhendu-jaṭādharāya
trilocanāya smara-kāla-hantre
samasta-devair-api pūjitāya
śrī-vaidyānāthāya namaśśivāya ॥ 2 ॥

bhakta-priyāya tripurāntakāya
pinākinī-duṣṭa-harāya nityam
pratyakṣa-līlāya manuṣya-loke
śrī-vaidyānāthāya namaśśivāya ॥ 3 ॥

prabhūta-vātādi-samasta-roga
praṇāśa-kartrē muni-vanditāya
prabhākara-indv-agni-vilocanāya
śrī-vaidyānāthāya namaśśivāya ॥ 4 ॥

vāk-śrotra-netrāṅghri-vihīna-jantoḥ
vāk-śrotra-netrāṅghri-sukha-pradāya
kuṣṭhādi-sarvonnata-roga-hantre
śrī-vaidyānāthāya namaśśivāya ॥ 5 ॥

vedānta-vedyāya jaganmayāya
yogīśvara-dhyeya-padāmbujāya
trimūrti-rūpāya sahasra-nāmne
śrī-vaidyānāthāya namaśśivāya ॥ 6 ॥

svatīrtha-mṛd-bhasma-bhṛtāṅga-bhājāṃ
piśāca-duḥkhārti-bhayāpahāya
ātma-svarūpāya śarīra-bhājāṃ
śrī-vaidyānāthāya namaśśivāya ॥ 7 ॥

śrī-nīlakaṇṭhāya vṛṣa-dhvajāya
srak-gandha-bhasmādy-abhiśobhitāya
suputra-dārādi-subhāgya-dāya
śrī-vaidyānāthāya namaśśivāya ॥ 8 ॥

phalaśrutiḥ

bālāmbikeśa vaidyēśa bhava-roga-hareti ca
japet nāma-trayaṃ nityaṃ mahā-roga-nivāraṇam

iti śrī-vaidyānāthāṣṭakam sampūrṇam ॥