tatō yuddha pariśrāṃtaṃ samarē ciṃtayāsthitam
rāvaṇaṃ cāgratō dṛṣṭvā yuddhāya samupasthitam ॥ 1 ॥
daivataiśca samāgamya draṣṭumabhyāgatō raṇam
upāgamyābravīdrāmaṃ agastyō bhagavān ṛṣiḥ ॥ 2 ॥
rāma rāma mahābāhō śṛṇu guhyaṃ sanātanam
yēna sarvānarīn vatsa samarē vijayiṣyasi ॥ 3 ॥
ādityahṛdayaṃ puṇyaṃ sarvaśatru-vināśanam
jayāvahaṃ japēnnityaṃ akṣayyaṃ paramaṃ śivam ॥ 4 ॥
sarvamaṃgaḷa-māṃgaḷyaṃ sarvapāpa-praṇāśanam
ciṃtāśōka-praśamanaṃ āyurvardhanamuttamam ॥ 5 ॥
raśmimaṃtaṃ samudyaṃtaṃ dēvāsura namaskṛtam
pūjayasva vivasvaṃtaṃ bhāskaraṃ bhuvanēśvaram ॥ 6 ॥
sarvadēvātmakō hyēṣa tējasvī raśmibhāvanaḥ
ēṣa dēvāsura-gaṇān lōkān pāti gabhastibhiḥ ॥ 7 ॥
ēṣa brahmā ca viṣṇuśca śivaḥ skaṃdaḥ prajāpatiḥ
mahēṃdrō dhanadaḥ kālō yamaḥ sōmō hyapāṃ patiḥ ॥ 8 ॥
pitarō vasavaḥ sādhyā hyaśvinau marutō manuḥ
vāyurvahniḥ prajāprāṇaḥ ṛtukartā prabhākaraḥ ॥ 9 ॥
ādityaḥ savitā sūryaḥ khagaḥ pūṣā gabhastimān
suvarṇasadṛśō bhānuḥ hiraṇyarētā divākaraḥ ॥ 10 ॥
haridaśvaḥ sahasrārciḥ saptasapti-rmarīcimān
timirōnmathanaḥ śaṃbhuḥ tvaṣṭā mārtāṃḍakōṃ'śumān ॥ 11 ॥
hiraṇyagarbhaḥ śiśiraḥ tapanō bhāskarō raviḥ
agnigarbhō'ditēḥ putraḥ śaṃkhaḥ śiśiranāśanaḥ ॥ 12 ॥
vyōmanātha-stamōbhēdī ṛgyajuḥsāma-pāragaḥ
ghanāvṛṣṭirapāṃ mitraḥ viṃdhyavīthī plavaṃgamaḥ ॥ 13 ॥
ātapī maṃḍalī mṛtyuḥ piṃgaḷaḥ sarvatāpanaḥ
kavirviśvō mahātējā raktaḥ sarvabhavōdbhavaḥ ॥ 14 ॥
nakṣatra graha tārāṇāṃ adhipō viśvabhāvanaḥ
tējasāmapi tējasvī dvādaśātma-nnamō'stu tē ॥ 15 ॥
namaḥ pūrvāya girayē paścimāyādrayē namaḥ
jyōtirgaṇānāṃ patayē dinādhipatayē namaḥ ॥ 16 ॥
jayāya jayabhadrāya haryaśvāya namō namaḥ
namō namaḥ sahasrāṃśō ādityāya namō namaḥ ॥ 17 ॥
nama ugrāya vīrāya sāraṃgāya namō namaḥ
namaḥ padmaprabōdhāya mārtāṃḍāya namō namaḥ ॥ 18 ॥
brahmēśānācyutēśāya sūryāyāditya-varcasē
bhāsvatē sarvabhakṣāya raudrāya vapuṣē namaḥ ॥ 19 ॥
tamōghnāya himaghnāya śatrughnāyā mitātmanē
kṛtaghnaghnāya dēvāya jyōtiṣāṃ patayē namaḥ ॥ 20 ॥
tapta cāmīkarābhāya vahnayē viśvakarmaṇē
namastamō'bhi nighnāya ravayē lōkasākṣiṇē ॥ 21 ॥
nāśayatyēṣa vai bhūtaṃ tadēva sṛjati prabhuḥ
pāyatyēṣa tapatyēṣa varṣatyēṣa gabhastibhiḥ ॥ 22 ॥
ēṣa suptēṣu jāgarti bhūtēṣu pariniṣṭhitaḥ
ēṣa ēvāgnihōtraṃ ca phalaṃ caivāgni hōtriṇām ॥ 23 ॥
vēdāśca kratavaścaiva kratūnāṃ phalamēva ca
yāni kṛtyāni lōkēṣu sarva ēṣa raviḥ prabhuḥ ॥ 24 ॥
phalaśrutiḥ
ēna māpatsu kṛcchrēṣu kāṃtārēṣu bhayēṣu ca
kīrtayan puruṣaḥ kaścinnāvaśīdati rāghava ॥ 25 ॥
pūjayasvaina mēkāgraḥ dēvadēvaṃ jagatpatim
ētat triguṇitaṃ japtvā yuddhēṣu vijayiṣyasi ॥ 26 ॥
asmin kṣaṇē mahābāhō rāvaṇaṃ tvaṃ vadhiṣyasi
ēvamuktvā tadāgastyō jagāma ca yathāgatam ॥ 27 ॥
ētacchrutvā mahātējāḥ naṣṭaśōkō'bhavattadā
dhārayāmāsa suprītaḥ rāghavaḥ prayatātmavān ॥ 28 ॥
ādityaṃ prēkṣaka japtvā tu paraṃ harṣamavāptavān
trirācamya śucirbhūtvā dhanurādāya vīryavān ॥ 29 ॥
rāvaṇaṃ prēkṣaka hṛṣṭātmā yuddhāya samupāgamat
sarvayatnēna mahatā vadhē tasya dhṛtō'bhavat ॥ 30 ॥
adha raviravadannirīkṣya rāmaṃ muditamanāḥ paramaṃ prahṛṣyamāṇaḥ
niśicarapati saṃkṣayaṃ viditvā suragaṇa madhyagatō vacastvarēti ॥ 31 ॥