dhyānaṃ

māṇikyavīṇāmupalālayaṃtīṃ madālasāṃ maṃjulavāgvilāsām ।
māhēṃdranīladyutikōmalāṃgīṃ mātaṃgakanyāṃ manasā smarāmi ॥ 1 ॥

caturbhujē caṃdrakalāvataṃsē kucōnnatē kuṃkumarāgaśōṇē ।
puṃḍrēkṣupāśāṃkuśapuṣpabāṇahastē namastē jagadēkamātaḥ ॥ 2 ॥

viniyōgaḥ

mātā marakataśyāmā mātaṃgī madaśālinī ।
kuryātkaṭākṣaṃ kaḷyāṇī kadaṃbavanavāsinī ॥ 3 ॥

stuti

jaya mātaṃgatanayē jaya nīlōtpaladyutē ।
jaya saṃgītarasikē jaya līlāśukapriyē ॥ 4 ॥

daṃḍakaṃ

jaya janani sudhāsamudrāṃtarudyanmaṇīdvīpasaṃrūḍha bilvāṭavīmadhyakalpadrumākalpakādaṃbakāṃtāravāsapriyē kṛttivāsapriyē sarvalōkapriyē|
sādarārabdhasaṃgītasaṃbhāvanāsaṃbhramālōlanīpasragābaddhacūlīsanāthatrikē sānumatputrikē|
śēkharībhūtaśītāṃśurēkhāmayūkhāvalībaddhasusnigdhanīlālakaśrēṇiśṛṃgāritē lōkasaṃbhāvitē kāmalīlādhanussannibhabhrūlatāpuṣpasaṃdōhasaṃdēhakṛllōcanē vāksudhāsēcanē cārugōrōcanāpaṃkakēḷīlalāmābhirāmē surāmē ramē|
prōllasadvālikāmauktikaśrēṇikācaṃdrikāmaṃḍalōdbhāsi lāvaṇyagaṃḍasthalanyastakastūrikāpatrarēkhāsamudbhūta saurabhyasaṃbhrāṃtabhṛṃgāṃganāgītasāṃdrībhavanmaṃdrataṃtrīsvarē susvarē bhāsvarē|
vallakīvādanaprakriyālōlatālīdalābaddha-tāṭaṃkabhūṣāviśēṣānvitē siddhasammānitē|
divyahālāmadōdvēlahēlālasaccakṣurāṃdōlanaŚrīsamākṣiptakarṇaikanīlōtpalē śyāmalē pūritāśēṣalōkābhivāṃchāphalē śrīphalē|
svēdabiṃdūllasadphālalāvaṇya niṣyaṃdasaṃdōhasaṃdēhakṛnnāsikāmauktikē sarvaviśvātmikē sarvasiddhyātmikē kālikē mugdhamaṃdasmitōdāravaktrasphurat pūgatāṃbūlakarpūrakhaṃḍōtkarē jñānamudrākarē sarvasaṃpatkarē padmabhāsvatkarē śrīkarē|
kuṃdapuṣpadyutisnigdhadaṃtāvalīnirmalālōlakallōlasammēlana smēraśōṇādharē cāruvīṇādharē pakvabiṃbādharē|

sulalita navayauvanāraṃbhacaṃdrōdayōdvēlalāvaṇyadugdhārṇavāvirbhavatkaṃbubiṃbōkabhṛtkaṃtharē satkalāmaṃdirē maṃtharē divyaratnaprabhābaṃdhuracchannahārādibhūṣāsamudyōtamānānavadyāṃgaśōbhē śubhē|
ratnakēyūraraśmicchaṭāpallavaprōllasaddōllatārājitē yōgibhiḥ pūjitē viśvadiṅmaṃḍalavyāptamāṇikyatējassphuratkaṃkaṇālaṃkṛtē vibhramālaṃkṛtē sādhubhiḥ pūjitē vāsarāraṃbhavēlāsamujjṛṃbha māṇāraviṃdapratidvaṃdvipāṇidvayē saṃtatōdyaddayē advayē divyaratnōrmikādīdhitistōma saṃdhyāyamānāṃgulīpallavōdyannakhēṃduprabhāmaṃḍalē sannutākhaṃḍalē citprabhāmaṃḍalē prōllasatkuṃḍalē|

tārakārājinīkāśahārāvalismēra cārustanābhōgabhārānamanmadhyavallīvalicchēda vīcīsamudyatsamullāsasaṃdarśitākārasauṃdaryaratnākarē vallakībhṛtkarē kiṃkaraŚrīkarē|
hēmakuṃbhōpamōttuṃga vakṣōjabhārāvanamrē trilōkāvanamrē lasadvṛttagaṃbhīra nābhīsarastīraśaivālaśaṃkākaraśyāmarōmāvalībhūṣaṇē maṃjusaṃbhāṣaṇē|
cāruśiṃcatkaṭīsūtranirbhatsitānaṃgalīladhanuśśiṃcinīḍaṃbarē divyaratnāṃbarē|

padmarāgōllasa nmēkhalāmauktikaśrōṇiśōbhājitasvarṇabhūbhṛttalē caṃdrikāśītalē vikasitanavakiṃśukātāmradivyāṃśukacchanna cārūruśōbhāparābhūtasiṃdūraśōṇāyamānēṃdramātaṃga hastārgalē vaibhavānargalē śyāmalē kōmalasnigdha nīlōtpalōtpāditānaṃgatūṇīraśaṃkākarōdāra jaṃghālatē cārulīlāgatē namradikpālasīmaṃtinī kuṃtalasnigdhanīlaprabhāpuṃcasaṃjātadurvāṃkurāśaṃka sāraṃgasaṃyōgariṃkhannakhēṃdūjjvalē prōjjvalē nirmalē prahva dēvēśa lakṣmīśa bhūtēśa tōyēśa vāṇīśa kīnāśa daityēśa yakṣēśa vāyvagnikōṭīramāṇikya saṃhṛṣṭabālātapōddāma lākṣārasāruṇyatāruṇya lakṣmīgṛhitāṃghripadmē supadmē umē|

suruciranavaratnapīṭhasthitē susthitē ratnapadmāsanē ratnasiṃhāsanē śaṃkhapadmadvayōpāśritē viśrutē tatra vighnēśadurgāvaṭukṣētrapālairyutē mattamātaṃga kanyāsamūhānvitē bhairavairaṣṭabhirvēṣṭitē maṃculāmēnakādyaṃganāmānitē dēvi vāmādibhiḥ śaktibhissēvitē dhātri lakṣmyādiśaktyaṣṭakaiḥ saṃyutē mātṛkāmaṃḍalairmaṃḍitē yakṣagaṃdharvasiddhāṃganā maṃḍalairarcitē|
bhairavī saṃvṛtē paṃcabāṇātmikē paṃcabāṇēna ratyā ca saṃbhāvitē prītibhājā vasaṃtēna cānaṃditē bhaktibhājaṃ paraṃ śrēyasē kalpasē yōgināṃ mānasē dyōtasē chaṃdasāmōjasā bhrājasē gītavidyā vinōdāti tṛṣṇēna kṛṣṇēna saṃpūjyasē bhaktimaccētasā vēdhasā stūyasē viśvahṛdyēna vādyēna vidyādharairgīyasē|
śravaṇaharadakṣiṇakvāṇayā vīṇayā kinnarairgīyasē yakṣagaṃdharvasiddhāṃganā maṃḍalairarcyasē sarvasaubhāgyavāṃchāvatībhir vadhūbhissurāṇāṃ samārādhyasē sarvavidyāviśēṣatmakaṃ cāṭugāthā samuccāraṇākaṃṭhamūlōllasadvarṇarājitrayaṃ kōmalaśyāmalōdārapakṣadvayaṃ tuṃḍaśōbhātidūrībhavat kiṃśukaṃ taṃ śukaṃ lālayaṃtī parikrīḍasē|

pāṇipadmadvayēnākṣamālāmapi sphāṭikīṃ jñānasārātmakaṃ pustakaṃcaṃkuśaṃ pāśamābibhratī tēna saṃciṃtyasē tasya vaktrāṃtarāt gadyapadyātmikā bhāratī nissarēt yēna vādhvaṃsanādā kṛtirbhāvyasē tasya vaśyā bhavaṃtistiyaḥ pūruṣāḥ yēna vā śātakaṃbadyutirbhāvyasē sōpi lakṣmīsahasraiḥ parikrīḍatē|
kinna siddhyēdvapuḥ śyāmalaṃ kōmalaṃ caṃdracūḍānvitaṃ tāvakaṃ dhyāyataḥ tasya līlā sarōvāridhīḥ tasya kēlīvanaṃ naṃdanaṃ tasya bhadrāsanaṃ bhūtalaṃ tasya gīrdēvatā kiṃkari tasya cājñākarī śrī svayaṃ|

sarvatīrthātmikē sarva maṃtrātmikē|
sarva yaṃtrātmikē sarva taṃtrātmikē|
sarva cakrātmikē sarva śaktyātmikē|
sarva pīṭhātmikē sarva vēdātmikē|
sarva vidyātmikē sarva yōgātmikē|
sarva varṇātmikē sarvagītātmikē|
sarva nādātmikē sarva śabdātmikē|
sarva viśvātmikē sarva vargātmikē|
sarva sarvātmikē sarvagē sarva rūpē|
jaganmātṛkē pāhi māṃ pāhi māṃ pāhi māṃ dēvi tubhyaṃ namō dēvi tubhyaṃ namō dēvi tubhyaṃ namō dēvi tubhyaṃ namaḥ ॥